SIBU: Servis Bas Ekpres Sibu-Song-Kapit ke berengkah Hari Enam tu tadi nyadi pemungkal ngagai Taun Baru 2022 ngagai peranak Kapit.
Nengah pemisi servis bas nya, dikearap nyungkak palan ekodagang temuai ngagai tikas ke lebih manah di nengeri tu dudi hari.
Inisiatif nya dipungkal Serikat Bas Lanang Road Bus Company Berhad enggau Rejang Transport Sdn Bhd ti udah ngepunka servis pejalai bas ari Sibu-Song-Kapit.
Menijar kedua-dua serikat nya, Chua Huat maya dirandau madah, pendiau jalai raya ke manah ari Sibu ke Kapit udah ngujungka sida ulih nyendiaka servis nya.
Kenu ku iya, naka tu serikat nya semina nyendiaka dua buah bas pulai mansang ngagai palan ke udah ditetap.
“Ila enti udah mayuh penumpang, kami deka nambahka bas laban kami bisi minta mayuh permit bejalai kin, nyadi aku deka nambah bas enti manah timbal.
“Nyema timbal manah dudi hari, kami deka muka pejalai bukai ambika chunto ari Bintulu terus ke Kapit tang nya bedau ulih diatu laban agi ba tikas nguju, ngena dua buah bas dulu,” ku iya.
Berebak enggau nya, siku orang gawa ba kaunster tikit, Simah Ranggau madah naka tu serikat sida semina nyendiaka servis dua buah bas bejalai ke Kapit..
Iya madah taga pejalai ari Sibu-Song-Kapit nya entara pukul 7 pagi, 11 pagi enggau 3 lemai ninting hari.
“Serikat kami, Lanang Express enggau Rejang Eskpres diatu nyendiaka bas ke Kapit berengkah 1 Januari 2022.
“Servis tu nyengkaum ari Sibu-Kanowit-Song-Kapit. Naka tu kami bisi nerima penumpang ari Miri ti deka pulai ke Kapit.
“Ninting hari, kami semina nyendiaka servis tiga kali bejalai iya nya pukul 7 pagi, 11 pagi, 3 lemai, pulai mansang ari Sibu- Kapit-Sibu,” ku iya.
Simah mega madah, siku penumpang deka diletak tambang berega RM22 aja enti ke Kapit.
Ngenang pasal Atur Pengawa Standard (SOP), ku iua genap penumpang dipinta ngena sengkabung mua maya ba dalam bas sepanjai ba rantau jalai ke Kapit.
“Diatu bas kami dibuka penuh tauka kapasiti 100 peratus iya nya 38 penumpang sekali bejalai. Aku mega meransang bala penumpang meli tikit timu betelefon nuju serikat bas kami ba lumur 084-332696 di Sibu enggau 010-6635973 di Kapit,” ku iya.
Nitihka pemerang tauka bas ari serikat bukai mega dipelaba nunda sida nambahka servis pejalai bas ekspres ngagai palan ke sama beduduk ari Jalai Sibu-Song-Kapit pemanjai 110 kilometer ti deka tembu.
