ARTIKEL

BEJAKU… Audrey (tiga kiba) bejaku rambau aum pemberita Pengerami Ngelalu Pengabang Gawai Dayak STF 2024 ba The Space, ICUBE, Icom Square ditu, kemari.

Servis manah dipandang peranak Rumah Anyie mujur narit ati raban STF

Facebook
Twitter
LinkedIn
WhatsApp
Telegram

KUCHING: Servis sereta pemanah ulah ti dipandang peranak Rumah Anyie Rajit, Matop, Betong mujur narit ati Gerempung Dagang Temuai Sarawak (STF).

Presiden STF, Audrey Wan Ulok madahka pemanah ulah peranak ba rumah panjai nya ngasuh sida milih baru rumah panjai nya endur ngatur Pengerami Ngelalu Pengabang Gawai Dayak Gerempung Dagang Temuai Sarawak (STF) 2024 kena 8 June tu ila.

“Sida ngasuh kitai seruran ngenang pemanah sereta penyelai lebuh meda main asal raban bansa Dayak lalu budi basa sida pen manah.

“Nya alai, rumah panjai sida dipilih raban STF baru endur ngatur pengerami nya,” ku iya.

Audrey mansutka jaku nya rambau aum pemberita Pengerami Ngelalu Pengabang Gawai Dayak STF 2024 ba The Space, ICUBE, Icom Square ditu, kemari.

Ku iya, mensia mayuh mega bepeluang ngena mayuh bengkah pekayan enggau muzik asal sereta sekeda ajat bansa Dayak.

“Program pemadu besai diatur maya nya ila iya nya Niti Daun Gawai ba pasar Betong kena pagi Hari Enam, endur kitai mantaika pengerami pupu bansa ba Sarawak.

“Bala temuai bepeluang ngasaika pemakai asal, meda asil pengelandik jari enggau ngambi bagi ngerami Hari Gawai Dayak,” ku iya.

Tandu iya, rambau Pengerami Ngelalu Pengabang Gawai Dayak taun siti nyin kemari, STF udah ngangauka 39 pengemeran media, kru televisyen enggau influencer media sosial.

Sida nya nyengkaum media menua luar baka Australia, China, Amerika Syarikat, Thailand enggau Indonesia.

Iya madah, bisi 153 temuai udah negrejister diri ari Kuala Lumpur, Brunei, Singapore enggau Sarawak empu ngulu pengerami nya seraya belajar enggau berami meda pemanah pesaka asal bansa Dayak ba Betong, Sarawak.

BERITA LAIN

BERITA TERBARU