LUNDU: Begunan Opis Perintah Nengeri Sarawak (Pelilih Menua Lundu) ti baru dikeandal deka nyadi peransang ngagai pengereja pengawa perintah nengeri gawa bebendar agi sereta meri servis ti manah ngagai rayat di kandang menua nya seriris enggau juluk ati Premier Sarawak Datuk Patinggi Tan Sri Abang Johari Tun Openg.
Pemangku Sekretari Perintah Nengeri Datuk Seri Mohamad Abu Bakar Marzuki madahka begunan opis perintah ti baru ba Pelilih Menua Lundu nya sebuah ari 41 projek opis perintah enggau kuarters perintah baru ti digaga ba renggat pelilih menua ungkup ngemanahka servis pengereja pengawa perintah di menua tu.
“Semua 41 projek tu nelan ungkus belanja RM1.5 bilion lalu udah dikemendarka perintah nengeri ba baruh Langgur Pemansang Malaysia Lumpar Ke-12 (RMK12).
“Kami beterima kasih ngagai perintah nengeri laban udah nyaga pengelantang pendiau raban pengereja pengawa perintah di menua tu,” ku iya.
Abu Bakar bejaku munyi nya rambau Pengawa Nasih Tanah Palan Opis Perintah Nengeri Sarawak (Pelilih Menua Lundu) ti dipenyadika Abang Johari ditu, ensana.
Kelimpah ari nya, iya andalka begunan baru nya ila deka ulih muka opis ejensi perintah nengeri enggau opis perintah besai ngambika meri mayuh agi pemaik servis ti diguna rayat.
“Nya deka ngemuntangka pengawa rayat ba pelilih menua tu laban semua ejensi perintah nengeri enggau perintah besai deka begelumu ditu.
“Nya mega deka ngurangka tating rayat, awakka sida enda ibuh ngusung mengeri maya deka mutarka pengawa sida,” ku iya.
Ngelansa Opis Perintah Nengeri Sarawak (Pelilih Menua Lundu) ti baru tu, projek tu digaga nengah ungkus belanja penyampau RM10 juta.
Kelimpah begunan opis baru, projek tu mega mungkur ngaga kompleks diau (kompleks kediaman) pengereja pengawa Perintah Sarawak, begunan Kort Bumiputera, balai besai, padang enggau tanam rekreasyen baru sereta moden ti deka digaga ba renggat kedua nangkan nya pengudah projek renggat keterubah tu tembu.
