Servis pengerai rayat dikemanah

LUBOK ANTU: Penembu Klinik Pengerai Lubok Antu deka mai pengelantang ngagai rayat dia kelebih agi ngangkatka tikas pengerai rayat.

Kaban Parlimen Lubok Antu Jugah Muyang madah, rayat ba Parlimen nya berasai lantang sereta gaga ati meda projek ke deka digaga nya.

“Pia mega, kitai ditu temegah ati enggau pengeransing Sapit Menteri Pengerai Dr Lee Boon Chye datai ngabas taba projek tu.

“Kitai ngarap penatai iya nyadi pengepun pengawa perintah mai ubah besai ngagai pekara ngangkat tikas servis pengerai ngagai rayat di Lubok Antu,” ku iya.

Dulu agi ari nya, iya nyempulang penatai Lee ngabas taba projek Klinik Pengerai Lubok Antu (Bansa 4), ditu tadi.

Maya nya mega, Lee ngetuaika aum bekaul enggau operasyen enggau perengkaguna klinik kelimpah datai ngabas taba projek.

Projek tu bekenaka ungkus RM28 juta digaga ba pemesai tanah empat ekar ditaga mai servis pengerai ke manah agi ngagai rayat Lubok Antu.

Penembu projek tu ila ulih ditapatka mayuh orang sereta ngurangka penyekut ba klinik bukai ke besemak.

NINGA PEMINTA RAYAT… Lee enggau Jugah maya aum bekaul enggau klinik baru nya.

Suara Sarawak