Sesa ngiga lima atlit dipilih ngarika Sarawak

KUCHING: Gerempung E-Lumba Sarawak (Sesa) nagit bulih lima iku nembiak ti bepeneleba sereta pandai dalam lumba nya ngarika Sarawak awakka ulih diangkat nyadi atlit entarabansa.
Presiden Sesa Afiq Fadhli Narawi madahka nya kebuah sida ngatur pekit e-lumba ke berengkah di Asajaya ungkup ngiga raban nembiak ti bisi peluang bemain e-lumba.
“Sekali tu kami ngiga raban nembiak di Batu Kawa nengah Pekit FIFA 21 (PS4) lalu ngerintai nama nembiak ti bisi peluang besai.
“Kami nagit ba rintai panjai urung 20 iku nembiak deka diambi awakka sida ulih bepekit lumba tu ba luar Sarawak,” ku iya.
Afiq bejaku munyi nya lebuh ditanya pemberita ba Pekit E-Lumba FIFA 21 (PS4) di Balai Penyerakup Mensia Mayuh Batu Kawa ditu, kemari.
Ku iya, bala nembiak ti ditemu bisi peluang tu ila deka dilatih enggau lebih meruan ba D-Virtual Park Kota Samarahan.
“Diatu kami ngena pelasar PS4 laban PS5 bedau datai.
“Champion deka bulih perais RM250, lumur dua RM150 enggau lumur tiga bulih RM100 kelimpah trofi.
“Bisi 68 iku nembiak nyadi pesereta pekit lalu sida beumur 22 taun ke baruh,” ku iya.
Iya madahka entara peneleba ti diambi kira dalam pekit tu nyengkaum pemandai lebuh nyaga bol, nyipak gol, ngulihka sipak panalti enggau ke bukai.
“Kami endang andalka ulih ngemansutka atlit entarabansa dalam e-lumba tu.
“Kelimpah ari nya, kami mega meri peluang ngagai tiga iku nembiak ari Gerempung Orang Bengal Sarawak nyereta pekit.
“Udah tu kami deka ngerembaika pekit ngagai menua Lundu enggau Serian kelimpah ngatur program ngelakuka e-lumba ngagai menua pesisir,” ku iya.

Suara Sarawak