SGH ngiga kaban belayan Thomas Janang

KUCHING: Sepital Besai Sarawak (SGH) diatu benung nyidi tiris pantis tauka orang ke sebilik enggau siku pesakit lelaki beumur 84 taun benama Thomas Janang.

Nitihka penerang diterima ari SGH, pesakit dibai kaban belayan iya berubat ngagai Unit Tasah enggau Emejensi kena 13 Disember tu tadi.

Tudah dibai berubat kia ketegal sendat seput (SOB) lalu dipasuk ba Wad 5 di sepital tekala nya.

Berindik ari nya, raban sepital minta mensia mayuh ke ngelala orang sebilik tauka kaban belayan tudah Thomas tu mai iya pulai ke menua laban udah dikemendar pansut ari sepital.

Bepelasarka penerang, adres kepenudi iya ba Lot 12028, Low Cost Phase 1, Jalai Stutong, 93350 Kuching.

Barang sapa ke ngelala kaban belayan Thomas Janang dipinta telefon ngagai Dr. Nora ba lumur 082-276666 sambung 5934 di Wad 5 enggau jampat.