Sherlyvia ngemeratka kualiti kereban nganta

KUCHING: Guna barang ke bekualiti sereta nemu ngintu pemeresi diri entara pekara pemadu dikemeratika Sherlyvia Inta, 26 taun lebuh ngerandang singkang diri ba bidang dagang bepelasarka pengawa ngantaka mua orang,

Sherlyvia kala nyadi siku ari pengajar ngantaka mua orang madahka tiap barang ti dikena pengudah meri servis ngagai orang mesti dituchi enggau beresi.

“Ninting hari lebuh meri kus nganta aku suah mesan bala ti datai ngambika nyaga kualiti enggau pemeresi diri awakka orang ti nerima servis pechayaka kitai.

“Enti orang ti ngena servis kitai puas ati, iya tentu deka nusi ngagai orang bukai pemanah servis ti diberi kitai,” ku iya lebuh dirandau Suara Sarawak, kemari.

Indu asal ari Miri tu madahka, kelimpah meri kus nganta iya mega bisi meri servis nganta ngagai mensia mayuh baka mantang bulu bansu, nyambung bulu mata, ngias mua, ngechat kukut enggau ke bukai.

Sherlyvia Inta

“Pengelandik tu dipelajar aku lebuh ngambi Kus Nganta SKM Tikas 3 kelimpah nyereta kus pemajik ari raban pengajar ti datai ari menua Indonesia.

“Lebuh meda gamal orang ti nganta ba aku bebali bajik, ati aku berasai gaga nya ngujungka aku rindu ngereja pengawa tu.

“Nya alai, ninting maya aku enda kala tinggal pemansang pasal dunya nganta enggau pemajik gamal nitihka ubah teknologi moden,” ku iya.

Ku Sherlyvia, pengawa meri servis nganta ngagai mensia mayuh digaga iya nitihka peminta, nya alai rega servis enda sebaka.

“Nyema orang nya nyambung bulu mata dalam dua jam tembu tang enti mantang bulu bansu kiraka dalam dua jam setengah baru tembu.

MANAH SERVIS…Enti orang ti ngena servis kitai puas ati, iya tentu deka nusi ngagai orang bukai pemanah servis ti diberi kitai.

“Nya alai, dalam sebulan urung 20 ngagai 30 iku orang ulih ngena servis aku, tambah mega aku ngatika diri,” ku iya.

Diatu Sherlyvia diau ba Kedah nitihka laki iya gawa dia, tang iya suah pulai ke Sarawak lebuh bisi peminta ari mensia mayuh ti kala ngena servis iya suba.

“Entara pemar ditapi aku diatu iya nya, mar pulai ke Sarawak ketegal penanggul pengerekai penyakit Covid-19 ke nuntung menua kitai.

“Kelimpah Sarawak, aku mega bisi bulih peminta ngaga servis nganta di Sabah, tang mayuh enda ulih tangkup dulu laban aku mar mindah jam diatu.

“Pemar nya ngujungka aku ngiga orang besemak ditu empu dulu ngambika pejalai dagang aku enda ngetu,” ku iya.

Ku Sherlyvia, taja napi penanggul bulih orang baru iya tetap gaga laban orang ti datai begunaka servis iya enda kala ngetu.

“Keterubah sida ngena servis aku, sida berasai pechaya lalu betusi enggau bala bakih ke bukai, ari nya aku bulih orang baru ninting maya.

“Taja semina ngelakuka servis nengah media rama, aku mega ngelakula dagang tu lebuh bisi betemu enggau orang,” ku iya.

Sherlyvia ngarapka diri ulih nyadi siku ari indu Dayak ke ulih muka kedai spa di Semenanjung enggau Sarawak jemah ila.

Sapa ti deka meda servis ti disediaka Sherlyvia, kita tau ngelawa facebook iya ba Sherly Gerll tauka page nganta iya empu sunshine_touch.

NAMBAH PENEMU…Entara raban kami ti kala masuk kus nganta.

 

Penerang silik ulih dipeda ba laman facebook Sherly Gerll tauka ruai sunshine_touch.

Suara Sarawak