SIBU: Sitak tebing sungai nyadi elemen beguna ti patut dipasuk ba Pelin Ngemaruka Mengeri Sibu.
Sapit Premier Sarawak, Datuk Seri Dr Sim Kui Hian madah, pekara nya beguna amat laban Sibu sebuah mengeri betuah bepalan ba pati Sungai Rajang enggau Sungai Igan.
Dr Sim madah, iya suah mantaika pekara nya ngagai Premier Sarawak, Datuk Patinggi Tan Sri Abang Johari Tun Openg ngambi tebing sungai nya dikemansang lalu dirintai ba pelin nya.
“Pekara tu beguna amat laban Sibu nyendia hab beguna baka palan ekonomi, main asal enggau pelajar ba wilayah tengah Sarawak.
“Nya alai, Perintah Sarawak chakah enggau Pelin Ngemaruka Mengeri Sibu tu,” ku iya.
Dr Sim mansutka jaku nya rambau Program Bejadi Pengerami Main Asal Borneo (BCF) 2023 ti diatur ba Palan Puang Tun Tuanku Bujang ditu, malam ensanus.
Ngelansa senentang pekara bukai, Menteri Pengerai Mensia Mayuh, Pengawa Berumah enggau Perintah Lokal nya madah, opis menteri sida udah mantaika Juluk Pemansang Meruan ngagai semua raban bekuasa lokal (PBT) ba Sarawak.
Iya nyemetak madah, opis menteri sida ngarap PBT ulih bejalaika mayuh inisiatif ngagai komuniti seraris enggau visyen kaunsil nuju mengeri meruan manggai 2031.
Ku iya, PBT ulih bejalaika polisi enggau atur dikena meransang pengawa ngena enggau ngeluar meruan nengah pekara ngaga begunan, pelajar enggau penyedar.
