KUCHING: Pengawa ngangkatka Siburan nyadi pelilih baru ba Bagi Menua Serian ulih ngubah gaya pemansang ke meruan agi.
Penyandang Dun Mambong, Datuk Dr Jerip Susil madah, tu beduduk ari Siburan engkeman nyadi Pelilih laban setipak enggau atur sereta ngembuan penyampau peranak ke majak nambah.
Ku iya, Pelilih Siburan mungkur Dun Stakan mimit, Tarat enggau enggau sebagi besai Dun Mambong ke majak dedat ari sukut pemansang enggau aktiviti ekonomi.
Mulaika kenang keterubah dichiri nyadi pengari rayat Dun Mambong ba taun 2001, iya madahka pelilih Siburan lebuh nya sebuah pasar mit seraya aktiviti enda richah baka diatu.
“Lebuh nya, aku berundingka chara deka ngemansangka Siburan nyadi sebuah pasar ti ulih nyukung dagang ditu lalu mayuh orang biak bekuli ngagai Singapore enggau Brunei.
“Pekara keterubah dikereja aku iya nya nambahka penyampau tubuh di Siburan lalu berandau enggau mayuh pemaju ngambi sama ngemansangka sitak nya sereta sida mega ngembuan tuju ke sebaka,” terang iya ba randau khas, ensanus.
Ku iya, genturung pendiau keterubah ditumbuh iya nya Taman Duranda Emas ke nyadi pemungkal nambahka peranak ba pelilih nya sereta meri peluang ngagai pemaju bukai nirika rumah jelan pemesai enggau rumah mit.
Jerip mega madah, Kaunsil Pemansang Pengawa Berumah (HDC) lebuh nya nirika 500 unit flat ba sitak Batu Gong ngujungka peranak di Siburan majak nambah.
“Pengudah rayat nambah tentu dagang ditu majak ngerembai sereta bisi mega penanggul bekal ai, kuasa karan enggau ke bukai.
“Tu siti pekara ke manah laban bisi aktiviti dagang dipejalai ditu lalu bisi mega bejual ba kaki lima. Nya tanda bemacham aktiviti dipejalai ditu lalu Siburan nyadi pasar ke mansang,” terang iya seraya madahka penanggul bekal ai di Siburan diputar lebuh numbuhka Stesyem Pam Ai.
Berebak enggau nya, iya meri besai terima kasih lebuh Kepala Menteri Datuk Patinggi Tan Sri Abang Johari Tun Openg ngangkatka Siburan nyadi pelilih baru kena Hari Enam tu tadi.
Iya mega madah, bemacham infrastruktur disediaka ditu baka Stadium Mit Siburan enggau klinik pengerai ungkup mensia mayuh.
Terang Jerip, klinik pengerai ti lama diatu digaga baru iya nya bansa tiga lebuh nyendiaka servis lutur, raban farmasi enggau lutur ngeli.
“Perambu kami dudi hari iya nya deka nirika sebuah agi sepital ba bagi menua tu. Kitai bisi sebuah sepital di Serian tang dekaka sebuah sepital besai didiri ditu ti semak enggau Kuching enggau Kota Samarahan ngambi ulih mutarka penedat di Sepital Besai Sarawak ke alai sepital tu deka bisi lutur pakar ba genap unit,” ku iya.
Berindik ari nya, Jerip madahka Pelilih Siburan nya pasar satelit ba Bagi Menua Serian ti nyukung mengeri Kuching lebuh nyendiaka peminta.
Terang iya, Siburan bisi pengulih nyadi pelilih tibang pemakai beduduk ari peranak ditu betanamka sayur, nupi jelu enggau ke bukai ngambi dijual ngagai pasar besemak.
“Nya kebuah, Siburan bisi pengulih nyadi pelilih tibang pemansang ungkup peranak Kuching enggau Samarahan. Perambu ngaga Autonomous Rapid Transit (ART) ari Serian nengah Siburan sereta Kota Samarahan ulih nyadi penyambung ngagai pelilih tu ngena perengka pengangkut nya,” ku iya madah baru.
Nya alai ku iya, pemansang ekonomi rama di Sibu mega deka diperati laban deka mayuh peminta ungkup rumah kedai enggau genturung pendiau beduduk ari aktiviti ekonomi benung chakah dipejalai.
