Sida ke bisi ngena gelang burak KKM dilalau anang pansut ari rumah

SIBU: Peranak Sibu Jaya ti kuarantin udah diasuh ngena gelang burak ari Opis Menteri Pengerai Malaysia (KKM) ditangkan ngambika enda pansut ari rumah ungkup timpuh 14 hari.

Tu berindik ari peresa Covid-19 ti digaga ba genturung Flat Sibu Jaya, kemari.

Pemesai Pengerai Bagi Menua Sibu Dr Teh Jo Hun lebuh ditanya pemberita pengudah badu meresa orang madahka, kelimpah enda dikemendarka keluar rumah sida mega mesti nganti gerah ari KKM sebarang maya.

“Sida ti dikuarantin tu deka diperesa kali ti kedua enggau ulih pansut pengudah 14 hari enti gerai ari jamin KKM,” ku iya.

Dr Teh madahka, semua peresa bebala mayuh Covid-19 ti digaga ngagai mensia mayuh di Pasar Tamu Sibu Jaya kena 31 Januari apin lama nadai diberi gelang putih ari KKM.

Ku iya, pengawa meri gelang putih tu digaga laban nitihka atur baru ari Komiti Penyangga Penusah Ngenyit Nengeri (JPBN).

Nangkan nya, peranak Sibu Jaya ti ngena gelang putih nyema ditemu diau ba palan mensia mayuh deka ditangkap.

Lalau nya datai ari Ketuai Balai Polis Sibu Jaya Inspektor Rodua Tayo.

Iya ngingatka peranak Sibu Jaya ti ngena gelang putih ngambika nitih perintah kuarantin ari KKM.

“Kitai deka ngetan sapa aja orang ti ngena gelang putih ari KKM nya lebuh diau ba palan mensia mayuh.

“Polis deka nyerahka sida ngagai KKM ungkup pansik bukai sebedau mai pekara nya ngagai kort,” ku iya.

Berebak enggau nya, iya madahka dikena nyamin perintah kuarantin ba Flat Sibu Jaya, polis deka matau berenggat ba genturung nya.

“Nadai sekat mindah digaga. Kitai udah ngaga Pelepa Jalai Alun (SJR) di jalai tama ke Sibu Jaya nya alai kitai semina matau genturung pendiau tu aja kelebih agi palan komersial Sibu Jaya,” ku iya.

Peresa bebala mayuh Covid-19 di flat Sibu Jaya kemari bejalai lanchar lebuh mensia mayuh meri kerejasama.

Urung 30 iku raban pengerai ti dikerahka bejalaika peresa nya kelimpah dijaga raban polis, raban RELA, Raban Penyaga Orang Periman (APM), raban Soldadu Darat Malaysia (ATM) enggau Kaunsil Kandang Menua Pesisir Mengeri Sibu (MDLBS).

Pengawa nya diatur berengkah pukul 9 pagi nyentuk tengah hari, kemari.