Sida semina meragam aku baka apai aku – Larry Sng

KUCHING: “Aku nadai nyimpan sebarang dendam ngagai bala orang ke kala mejah laban mayuh agi ari sida nya bedau ngelala sapa aku tang semina meragam aku tu baka apai aku,” ku Larry Sng.

Chairman PKR Sarawak nya madah, iya enggau apai iya dua iku orang ke enda sama penemu ari sukut pengering enggau prinsip.

Dulu ari nya Larry madah nadai agi pekara dilalai sereta enda ngasuh tekenyit tuai renggat baruh PKR di Sarawak pansut parti.

Kenyau beberapa hari ke udah diperati penyampau tuai renggat baruh pansut parti, entara nya Mas Gading, Bandar Kuching, Stampin, Petra Jaya, Kanowit, Lanang, Lubok Antu enggau Bintulu.

“Iya, nya enda ngasuh tekenyit laban berita selebubu sida pansut ukai agi pekara dilalai kenyau beberapa minggu ke udah.

“Aku ngarapka pekara ke lebih manah ngagai sida laban udah nyaup pemujur parti pengelama 20 taun ke udah,” ku iya nengah sebengkah penerang dibantai ba Facebook malam ensana.

Kenu ku Larry, ulah sida pansut ari parti chukup ngenyinu lalu ukai semina ba raban ketuai tang mega penyukung sida.

“Laban ke nyadi siku orang dalam politik pengelama 20 taun, aku ngembuan peneleba keterubah enggau tumu agi ngasai baka ni parti keterubah aku (PBDS) dikinsil, udah nya kena buai ari PRS sereta badu mangku pengawa ngiring SWP.

“Nya pengingat ke chukup pait enggau pemuntan pengawa ke chukup pedis sereta ngasaka ati aku.

“Tang, nya ukai reti aku puntan tang bulih mayuh agi pemujur, pia mega aku nemu pengingin bala ketuai tu,” ku iya.

Tandu Kaban Parlimen Julau nya mega, mayuh orang enggai sebilik enggau PKR Sarawak agi laban ngasaika diri kena buai hak sereta nadai agi peluang dikena beretan sereta mansang.

Pia mega, ku iya ke bukai nyangka ngasaika prinsip enggau juluk parti nadai agi nyata lalu ngujungka kedua pansut ari parti laban duit enggau pangkat tang tu semina sekeda aja.

“Taja pia baka ni pengandal sida bekaul pekara tu, aku ngarap sida deka berunding baru enda lama.

“Dibaruh iring aku, seruran bisi peluang endur genap penau dikemansang taja sida ukai sebagi ari tim ke menang.

Suara Sarawak