SIDS semina dikerembai di Sarawak

Pekara tu udah ditetap nitihka konstitusyen menua

KUCHING: Pampang Serakup Indu Dayak Sarawak (SIDS) semina ulih dikerembaika ba Sarawak aja.

Chairman iya, Datuk Ir. Alice Jawan Empaling madah pekara nya endang udah ditetapka nitihka konstitusyen menua ti madahka pampang SIDS semina ulih dikerembai ba nengeri tu.

“Taja pia, kami ulih ngaga siti gempung begulai enggau bala indu Dayak ti diau di Semenanjung.

“Nengah gempung nya, kami ulih bekerejasama enggau sida ngambika sida ulih ngemansangka diri sida ba Semenanjung,” ku iya.

Datuk Ir. Alice Jawan Empaling

Alice madah munyi nya lebuh dirandau raban pemberita pengudah pengawa nyain Sempekat Pemereti Ati (MOU) entara SIDS enggau Universiti Putra Malaysia (UPM) bekaul enggau ‘Tan Sri Empiang Jabu Research Chair’ dalam Pelajar Indu Dayak ti diatur ba sebuah hotel tebilang ditu.

Rambau pengerami nya, ba jaku iya, Alice madahka ba April 2019, sida udah nambah dua pampang SIDS ke baru iya nya di Kemena enggau Selangau ti nyadika pampang SIDS di selampur Sarawak 28 pampang.

Berebak enggau nya, lebuh dirandau bekaul enggau pengerami nya, iya madahka pansik bekaul enggau pelajar nya agi dalam randau sida.

“Topik bekaul enggau pekara nya agi dalam randau lalu pansik mega deka digaga pengudah buka musin belajar baru ba September tu.

“Kami deka ngiga raban pemansik ti deka mantu dalam pansik tu lalu ngaji pemansik ngambika ngaga pansik bekaul enggau komuniti Dayak di Sarawak,” ku iya.

Ku Alice, enggau penumbuh ‘Tan Sri Empiang Jabu Research Chair’ sida ulih ngaga pansik bekaul enggau pengawa indu Dayak ti nyadi ketuai ba menua tu.

“Tu siti ari chara kitai indu Dayak ngemansangka diri.

“Kebuah pia laban nadai statistik ti madahka pekara ti digaga indu Dayak nyadi ketuai,” ku iya.

Nya alai sida deka numbuhka bengkel, pansik sereta analisis bekaul enggau pekara indu Dayak ngambika kitai nemu dini tikas kitai,ku iya.