SRI AMAN: Raban Penyangga Orang Periman Malaysia (APM) kelebih agi Kaban Volunteer Tetap Opis (ASTP) diperansang nyikap diri ngena bemacham penemu enggau pengelandik.
Pegawai APM Pelilih Lubok Antu, Lt. (PA) Desem Samuel madah, beguna amat sida belajar enggau nyikap diri ngena bemacham pekara ke pemaik begulai dikena meri servis nyulut.
Berebak enggau nya, Desem ngulu lima raban ASTP Lubok Antu ngatur penemuai belajar ngagai Palan Ekonomi Digital (PEDi) Lubok Antu kena Hari Tiga tu tadi.
“Tuju penemuai tu diatur dikena nambahka penemu enggau pengelandik raban tu bekaul pengawa ngena aplikasyen Microsoft Excel.
“Pekara tu beguna amat laban endang pangku pengawa sida ngaga bemacham ripot enggau pekara bekaul surat ninting hari.
“Ukai naka nya aja, kami bela diajar chara ngena Shoppe Seller lalu tu peluang manah dikena kami nambahka penemu enggau pengelandik diri,” terang iya.
Nya alai, iya ngarap raban PEDi ulih mantu sida ngena sebuah komputer dudi hari sereta nanggam kaul kerejasama.
Dulu ari nya, sida mega bepeluang ngatur penemuai belajar ngagai Opis Pelilih APM Betong.
Desem madah, tuju penemuai nya dikena meri penemu ngagai raban nya bekaul pengawa ngatur opis, perengka logistik enggau bilik operasyen APM.
“Pegawai ba bilik operasyen patut nyikap diri ngena bemacham penemu enggau atur bekaul laban sida nyadi orang keterubah ti nyadung informasyen ngagai mensia mayuh.
“Kami ngembuan pengandal ati besai ngagai APM Betong ulih bekerejasama sereta ngembing raban kami dudi hari,” ku iya.
