SARATOK: Kes penusah angus majak nambah ba menua tu ngasuh kitai irau kelebih agi penusah nuntung rumah panjai.
Sapit Menteri Pengeluar Kuasa enggau Pengeraja Asal, Ali Biju madah, nyau deka ninting minggu kitai nerima berita sinu pasal penusah karam di darat tu.
Ku iya, penusah angus kandang sebulan ke udah balat ngirauka ati lalu pemadu baru nuntung Rumah Panjai di Nanga Rasau, Engkilili kena 16 September tu tadi.
“Ari nya, kitai enda tau enda nyikap diri ngena penemu, abis nadai nemu chara ngena perengka pengerara api.
“Kebuah pia laban penusah tau nyadi sebarang maya, kelebih agi musin kemarau baka diatu, api jampat endar mau lalu rumah angus sekejap aja.
“Taja penusah enda ulih diseliah, tang enti kitai bisi penemu ngena perengka pengerara api, kitai ulih madam api ke baru nyadi lalu penusah ulih diketu naka nya,” terang Ali.
Ali mansutka jaku nya lebuh bejaku ba mua mayuh rambau Program Randau Pemesai Begulai Enggau Rayat ba Rumah Tama Ancharang, Nanga Melupa ditu, pagi kemari.
Ku Ali, peranak rumah panjai nengah Komiti Pemansang enggau Pengelikun Genturung Pendiau (JKKK) tau ngangauka raban bomba datai meri licha enggau ngajar chara ngerara api ti betul.
Udah nyadi pangku pengawa raban bomba ngenataika penerang beguna ngagai rayat renggat baruh laban tu pulaika pemanah enggau pengelantang semua.
Peranak Rumah Tama mega bisi nerima lapan unit perengka pengerara api ti disuaka Nazry empu ngagai Tuai Rumah Tama seraya dikemata Ali enggau bala bukai.
“Ngagai rumah panjai tauka genturung pendiau ti apin disikap ngena perengka pengerara api tu tau dipinta ngagai Palan Servis Komuniti Sitak Parlimen Saratok.
“Penyampau perengka pengerara api diberi mega bepanggai ba pemanjai rumah, laban genap rumah panjai enda sebaka pemanjai,” ku iya nyimpul jaku.
