Siku bebadi nyawa, dua bakal, lori enggau 4WD belantak

MIRI: Siku deriba lori bebadi nyawa seraya dua agi bakal pengudah lori enggau entukar 4WD belantak ba Jalai Miri-Bintulu besemak enggau palan temuai Borneo Tropical Rainforest ditu, pagi tadi.

Ketuai Bomba enggau Penyah Penusah Miri Law Poh Kiong madahka sida nerima kangau penusah sebuah lori enggau entukar 4WD belantak urung pukul 6.56 pagi.

Kenu ku iya, seraban ari Opis Bomba enggau Penyah (BBP) Lopeng berumban ngesah ngagai endur penusah nyadi pengudah nerima kangau nya.

“Niang tepekul ba bangku deriba lori pikap dua tan pemerat dibai pansut ngena kereban ‘Rescue Tools’.

“Taja pia, niang benama Huang Pek Sing, diau di Taman Tunku ditu dituku bebadi nyawa tekala nya ari raban perubat sepital,” ku iya ba sebengkah penerang tadi.

Nitih ku penerang, niang benung ba rantau jalai ke Batu Niah ari Miri lebuh belantak enggau sebuah entukar 4WD ditepan dua ke bukai.

Tang seduai nya, deriba enggau penumpang pikap nya semina bakal mimit sereta mujur ngemansutka diri lalu ditaban ke sepital.

Bangkai niang udah diserah ngagai piak polis ngambika atur patut dipejalai.

TEPEKUL… Piak bomba nguji mansutka niang ari lori.