BANGKOK: Tebal agi orang deka munuh gerinang laban iya tu sebansa indu utai ke semina ngerusak, tang lain ga penyadi di menua Thailand lebuh siku lelaki bedarat mai ‘pesakit’ ngambika diperubat ba siku lutur jelu.

Nampung penerang dibantaika sebuah portal berita di menua tu, madahka siku orang benama Thanu Limpapattanawanich mantaika sekeda gambar ba laman Facebook bekaul enggau ‘pesakit’ pulai hari ke suah ngelawa iya.

Thanu ke mega siku lutur jelu ari Krathum Baen di Thailand suah ngidupka nyawa ‘pesakit’ ke nyelai pendiau.

Hari siti, siku orang datai mai gerinang ke udah bakal kena indik orang bukai.

Ketegal enggai ngelakka indu utai nya mati ba tisi jalai, orang nya ngengkah gerinang nya ba tapa jari lalu mai iya terus ke Sepital Jelu Sai Rak.

Seraya tuchum kediri ngagai orang ke mai gerinang nya, Thanu ngaga pemutus merubat kes nya enggau enda bebayar.

Lutur nya ngaku, tu keterubah iya nerima siku orang datai mai gerinang tang iya ngasaika nya siti pemar.

Taja pia, nadai mayuh utai ulih dikereja iya semina ngengkahka gerinang nya dalam sebuah balang kacha ke ngundan oksigen ngambika gerinang nya ulih idup.

“Aku ngemendarka lelaki nya mai gerinang nya pulai lalu ngintu gerinang nya. Nadai minta bayar aku merubat gerinang nya,” ku iya.