Siku lelaki ditagup baya maya nyala

LUNDU: Siku lelaki peranak Indonesia kena tagup baya ba Sungai Stoh, Rambungan kena Hari Lima tu tadi.

Nitih penerang ari Pemangku Sapit Direktor Opis Bomba enggau Penyah Penusah, Tiong Ling Hii, Ridwan Jayadi beumur 25 taun benung nyala ikan ba sungai ke enda jauh ari rumah iya.

Ku iya, iya nurun ngagai sungai nya pengudah jala iya tekait dalam ai.

Ling Hii madah, lelaki nya ditagup siku baya lalu ditarit ke dalam ai sereta dipelabaka lemas.

“Balai Bomba enggau Penyah Penusah Lundu bisi nerima kangau tasah urung pukul 2.50 lemai.

“Naka ripot tu digaga, tubuh lelaki nya empai temu,” ku iya.

Tandu Ling Hii, ejensi nyengkaum APM enggau PDRM sereta orang kampung bela besaup ngemujurka operasyen SAR ngiga lelaki nya.

Ku iya, SAR dipejalai tungga ke ulu enggau ili sungai lalu kandang ngiga lelaki nya urung 5 KM penyauh.

Ku iya, sepanjai pengawa SAR, sida lalu empai tetemuka tubuh lelaki nya.

AGI BEGIGA…Operasyen SAR ngiga Ridwan Jayadi ti ditagup baya ba Sungai Stoh, Rambungan Lundu.