Siku lelaki ngaku salah, masung pangan indu diri ti agi baruh umur

KUCHING: Siku nembiak lelaki ngaku salah masung pangan indu iya ke agi baruh umur nyentuk ke betubuh bisi lalu dipelabaka beranak bulan Mei tu ila udah ditan ba Sekula Henry Gurney sampai umur iya manggai 21 taun.
Akim Kort Khas Nembiak Jason Juga udah ngerah nembiak ke beumur 19 taun nya ditan ba Sekula Henry Gurney pengudah mendingka penemu ari pegawai pemulai pemanah ulah ari Opis Pengintu Pendiau kemari.
Nembiak nya ngaku salah masung pangan indu iya ke baru beumur 15 taun ba sebuah rumah ba Kampung Skibang, Bau entara bulan Ogos enggau September 2020.
Iya ngaku penyalah diri nitihka Seksyen 376(1) Kanun Keseksaan lalu ulih diukum jil 20 taun sereta lunsin.
Nitih penerang kes, indu (tudah ke dipasung) bisi beperesa ba Klinik Pengerai Sebisak, Kota Samarahan urung pukul 8 pagi 15 Oktober 2020 lalu iya dipadahka udah betubuh bisi manggai 11 minggu.
Udah nya iya terus betemu enggau pangan lelaki iya nya (tudah ke salah) lalu besemaya nyanggup diri nyadi apai ngagai anak ke dikandung.