Siku lenyau ba penusah perau karam di Ng Payang

SARIKEI: Siku peranak Indonesia dipelaba lemas pengudah perau karam dipangka alun gelumbang kapal ba Sungai Rajang semak Nanga Payang, lemai kemari.

Dua iku peranak menua tu, Romiton Anthony, 27 taun enggau pengempu perau, Bahtiar Janggu, 25 selamat ba penusah ke nyadi urung pukul 5 lemai nya.

Palan Operasyen Bomba Sarawak madahka peranak Indonesia ti lenyau benama Rian ti gawa nyadi juruelektrik di Sibu.

Beduduk ari nya, sida lalu ngaga ripot pasal pengelenyau Rian tu ba Balai Polis Sarikei, ditu tadi.

“Bomba nerima ripot nya pukul 7.36 malam tang pengudah berandau, komander operasyen netapka operasyen deka dipejalai berengkah ari sehari tu.

“Operasyen enda dipejalai kemari ketegal pengelikun, hari udah malam enggau hari ujan,” ku iya ba sebengkah penerang.

Nitihka ripot polis, sida tiga bejalai nuju Nanga Payang ari Sarikei tang perau dikena sida karam ketegal dialunka gelumbang kapal pengudah setengah jam pejalai.

Romiton enggau Bahtiar ulih bepaut ba tangki minyak seraya Rian ditemu lenyau.

Seduai diselamatka orang berikan ti bisi tepedaka perau seduai karam.