ARTIKEL

ZAMRY ALLI

Siku nembiak lelaki dikeduan ngaga ripot polis

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

BETONG: Siku nembiak lelaki ti dikemegau ba media sosial ketegal dikeduan mujur ngaga ripot polis pagi tadi.

Tuai Polis Pelilih Betong, DSP Zamry Alli madah, nembiak beumur urung 14 nyentuk 15 taun nya ngaga ripot polis pengudah dikeduan seraban nembiak bukai.

“Tudah datai ngagai Balai Polis Betong ngaga ripot polis pagi tadi bekaul kes nya ti dikemegau ba media sosial,” ku iya.

Nangkan nya, Zamry bela ngenukuka kes nya nyadi ba Spaoh.

Iya madah, Indu Opis Polis Pelilih (IPD) Betong udah muka siti keretas pansik ba baruh Seksyen 323/506 Kanun Keseksaan enggau Seksyen 233 Akta Komunikasi dan Multimedia 1998.

“Enti dikenuku salah ba baruh Seksyen 323 Kanun Keseksaan, saspek ulih dijil nyentuk setaun tauka diukum mata duit nyentuk RM2,000 tauka kededua sekali.

“Nangkan nya, enti dikenuku salah ungkup penyalah ba baruh Seksyen 506 Kanun Keseksaan ulih dijil nyentuk tujuh taun tauka diukum mata duit tauka kededua sekali.

“Ungkup penyalah ba baruh Seksyen 233 Akta Komunikasi dan Multimedia 1998, ulih diukum mata duit enda lebih ari RM50,000 tauka dijil enda lebih ari setaun tauka kededua sekali enti dikenuku salah,” ku iya.

Taja pia, naka tengah hari tadi, ku iya, nadai sebarang pengawa nangkap dipejalai.

Ba video ti dikemegau ba TikTok enggau Facebook tumu pagi tadi, siku nembiak lelaki ditampar siku nembiak bukai berapa kali ba mua enggau pala.

Ba video nya mega siku agi nembiak lelaki bisi dipeda ba palan kes nya nyadi.

Zamry ngelalau semua raban enda ngaga sebarang peragam bekaul kes nya laban kes nya benung dipansik polis.

BERITA LAIN

BERITA TERBARU