Siku nembiak lemas ba Sungai Julau

JULAU: Siku nembiak lelaki mati lemas di Sungai Julau enda jauh ari Rumah Akun, Jalai Nanga Matop, Julau lemai, tadi.

Nembiak ke lemas nya dipadahka beumur, 14 taun lalu maya penusah nyadi iya dipadahka benung bejalaika pengawa memarin begulai enggau bala bakih ari rumah panjai ke besemak urung pukul 2.30 lemai.

Dipelaba maya benung mandi, nembiak nya enda nemu nyemerai ditabanka arus sungai begulai enggau menyadi iya.

Taja pia, menyadi nembiak nya mujur nyelamatka diri.

Orang rumah panjai dipadahka pasal penusah nya terus nurun bejalaika Operasyen Ngiga enggau Nyelamat (SAR) nembiak nya lalu mujur ditemu.

Pengudah ditemu nembiak nya terus dibai ngagai Klinik Pengerai Julau ngambika diperubat.

Maya ditemu, nembiak nya endang udah nadai ngelala orang agi lalu bisi dipeda bedarah ba pending enggau mulut.

Piak Klinik Pengerai Julau udah ngenukuka nembiak nya udah nadai.

PALAN PENUSAH…Ditu mih nembiak nya ditabanka arus sungai sebedau iya lemas.