Siku nembiak OKU lemas udah temu

KAPIT: Siku nembiak lelaki ke berumur 8 taun ke timpang pendiau (OKU) ari Rumah Gawan, Lepong Baleh ditu ditemu parai lemas pagi tadi.

Dulu ari nya, operasyen ngiga nembiak tu diuluka Pemesai Opis Bomba enggau Penyah Penusah (Bomba), Allok Taga enggau dibantu raban Opis Penyaga Mensia Mayuh Kapit udah nerima kangau mensia mayuh nengah lumur 999 urung iya jam 6.15 lemai kemari.

Pengawa ngiga nembiak ke dipelaba lemas nya diketu laban hari udah petang lalu dilanjarka mua ke pagi tu tadi.

Tubuh nembiak nya ditemu urung pukul 7 pagi tadi sepenyauh 30 kaki ari tebing sungai endur iya ke diripot lenyau kemari maya iya mandi ba sungai nya.

Beduduk ari nya, tubuh niang tu udah dianjung ngagai piak polis ngambika dipansik enggau silik.

SINU…Piak bomba enggau JPAM ngatung nembiak ke udah nadai nya ngambika dipansik enggau silik.