Siku nembiak Sibu belajar ba Taiwan bebadi nyawa labuh ari ringkat 8

SIBU: Siku nembiak lelaki ari Malaysia ti belajar ba sebuah universiti di menua Taiwan diripotka bebadi nyawa kena Hari Enam.

Nitih penerang sebuah portal berita jaku China menua tu sehari tu (Hari Minggu) madah, tudah ke babadi nyawa nya beumur 20 taun asal ari Sibu diripotka labuh ari ringkat 8 begunan universiti nya urung pukul 3.30 lemai.

Portal nya madahka tudah belajar bidang Injinir Elektrik enggau Elektronik di Universiti Teknologi Nasional Taiwan.

“Tudah niki ke ringkat lapan bengunan universiti nya lalu dipelabaka labuh enggau enda sengaja.

“Polis di Taiwan ningkah kebuah ari dalam ngujungka tudah bebadi nyawa,” ku portal nya diambi ari laman media rama.

Berebak enggau nya, Chairman Gerempung Siswazah Taiwan Sarawak Pampang Sibu Lawrence Tiong maya dirandau kemari (Hari Minggu) madah tudah dipelabaka teguran runding lalu ngujungka iya kempang ngapuska seput diri enggau chara baka nya.

“Sebedau nya, tudah bisi madah ngagai indai iya deka pulai kemisi ba menua. Iya udah nya minta ngagai universiti deka pulai,” ku iya.

Kenu ku iya, tudah endang patut terebai ke Kuala Lumpur kena Hari Enam laban tiket udah dibeli.

Taja pia, ku Tiong, tudah enda dikemendarka pulai laban nadai Covid-19.

“Asa laban enda ulih pulai ke menua nyangka nya ngachau runding lalu ngujungka iya kempang ngagai pemutus baka nya,’ ku iya.

Berebak enggau nya, iya madah gerempung benung ngatur visa enggau proses ke patut awakka indai enggau menyadi iya ulih bekejang ke Taiwan ngambika bangkai tudah.

“Kami benung minta permit khas ungkup indai enggau menyadi iya ngambi ulih bekejang ke menua nya lalu enda ibuh dikuarantin dua minggu,” ku iya seraya madah apai tudah udah nadai kena 2013.

Suara Sarawak