MIRI: Siku orang tuai diripotka lelang, nadai pulai ke rumah pengudah nurun ke kebun iya empu ke bepalan enda jauh ari rumah panjai.

Tudah ke lelang tu indu beumur 75 taun ari Rumah Niga, Sungai Nyiro, Tinjar Baram udah diripotka anak iya empu ba Balai Polis Long Lama kena Hari Tiga tu tadi pengudah nguji ngiga tang nadai temu.

Nitihka pengari Palan Operasyen Bomba Sarawak, tudah ke lenyau nya nurun ke kebun nya begulai enggau anak iya ba Semalai Tinjar kena 24 April tu tadi.

“Tang anak iya pulai baru ke rumah panjai, tinggal tudah indai iya aja ba kebun.

“Tu beduduk ari ngelama tu tudah indai iya nya endang suah bemalam ba langkau kebun nya,” ku iya madah nengah sebengkah penerang, kemari.

Ku tandu penerang nya, kena 25 April, anak iya nya tadi nurun baru ke kebun tang nadai tepedaka indai iya di kebun.

Ku iya, puas iya nguji ngiga begulai enggau sida serumah tang agi nadai tetemuka sebarang bekau.

Beduduk ari nya, ripot terus digaga anak iya. Raban ari Balai Bomba enggau Penyah Penusah (BBP) Lopeng udah bejalaika pengawa nyidi enggau ngesah (SAR).