Siku pengajar indu kena tipu ‘arkitek London’

SIBU: Ketegal kelalu teperasa enggau tawing ari menua luar dikelala nengah aplikasyen ‘Dating Online’ (OMI) lalu ngumbai nya amat keran deka mai iya jadi ngujungka siku pengajar indu beumur 40-an ditu rugi RM4,000.

Ketuai Polis Pelilih Sibu, ACP Stanley Jonathan Ringgit ba sebengkah penerang kemari madah, kena 17 March tu tadi indu nya udah bekelala enggau siku lelaki benama Jeffrey Ben Mayne nengah aplikasyen OMI.

Ku iya, lebuh seduai bekelala enggau pangan diri, lelaki nya madahka diri gawa nyadi arkitek London.

“Pengudah bekelala manggai sebulan, pengajar indu nya udah tekait ati enggau lelaki ti madahka diri gawa nyadi arkitek London nya.

“Lelaki nya madahka iya deka datai ke Malaysia laban deka jadi enggau pengajar indu nya.

Ku Stanley, kena 17 April tu tadi, Jefrey madahka diri benung sakit enggau deka beputung sereta begunaka duit RM2,000 ungkup ungkus beputung.

Terang iya, Jefrey udah minta pengajar indu nya mayar ungkus beputung kelimpah besemaya deka jadi enggau iya.

“Ba hari ti sama urung pukul 7 pagi, pengajar indu nya udah mindahka duit RM1,000 ngagai akaun Maybank 157175223410 atas nama Quah Jia Hui laban iya arap amat Jefrey deka jadi enggau iya enti udah gerai.

Kena 1 Mei tu tadi urung pukul 11 pagi, Jefrey sekali agi minta pengajar indu nya mantu mayar bil sepital beungkus RM3,000.

“Pengajar indu nya enda sedarka diri ditipu, udah mindahka duit RM3,000 ngagai akaun Agro Bank 2005861000070753 atas nama Suraiya Hani,” terang iya silik agi.

Ku Stanley, pengajar indu nya semina sedarka diri ditipu pengudah tetemuka lumur telefon iya udah disekat Jefrey.

“Kes tu deka dipansik nitihka Seksyen 420 Kanun Keseksaan,” tandu iya.

Suara Sarawak