BETONG: Siku lelaki peranak Kampung Lidong ti labuh ari bot maya nginti udah ditemu lemas enda jauh ari iya ke labuh ba Sungai Skrang, ditu pagi tadi.
Nitihka penerang Komander Operasyen Tim Alpha ari Balai Bomba engggau Penyah Penusah (BBP) Bagi Menua Betong, PBK I Henry Jugah madahka, niang Baki Nyambong, 49 taun ditemu raban peranak rumah panjai tunga ke ili lebih kurang 50 meter alai iya ke labuh.
Raban bomba nerima kangau ari mensia mayuh urung pukul 8.39 pagi tadi lalu sida betubuh enam iku terus ngena sebuah bot ngelawa palan penusah.
Tubuh niang Baki dibai ngagai PKB Bomba Betong urung pukul 8.44 pagi kemari sereta diserah ngagai raban polis Sri Aman ungkup pansik silik.
Dulu ari nya, niang Baki ke mega pinchin soldadu diripotka labuh ari bot kena lemai 3 Februari tu tadi urung pukul 6.36 lemai maya nginti enggau menyadi iya ba Sungai Skrang.
Raban SAR dikemujurka raban Bomba Betong sereta dibantu semilan iku polis, Raban Penyaga Orang Periman Malaysia (APM) enggau 12 iku peranak rumah panjai.
