BINTULU: Serba Dinamik Sdn Bhd udah nyuaka bantu ngagai siku staf serikat nya, Felixster Mag Buku ke udah dituntung penusah angus rumah.
Ku Mandal Presiden Operasyen Labuan enggau Malaysia Timur, Anjelina Lee, program ke diatur nya beguna amat ngambi nyaga pengelantang staf.
Ungkup penerang semua, sebuah rumah panjai Tubau angus kena bulan Mei tu tadi.
Pengawa nyuaka bantu nya dipejalai Opis Komunikasyen enggau Pekara Korporat enggau disaup Opis Pengereja Pengawa ba Opis Pengatur Pengawa Bintulu Integrated Energy Hub (BIEH).
Felixster udah nerima pemeri enggau barang diguna pemeri ari serikat Serba Dinamik Sdn Bhd.
Entara bantu tu iya nya lampu solar, tong gis, tilam, tikai enggau bantu pemakai.
Nambahka nya, staf serikat nya mega udah gerah jari nyuaka belanja enggau barang ke udah dikena ngagai Felixster kelai penyinu ati betatika penusah ditapi iya.
“Pemeri serikat nya nentuka staf ransing enggau regas agi bejalaika pangku pengawa udah tu.
“Kitai mesti nyaga pengelantang staf nyema sida dituntung penusah lalu ngemeratka ulah besaup sekalika maya tusah tauka senang,” ku iya nerang.
Nambahka nya ku Anjelina, staf mega deka sedarka serikat naka ulih nyaga pengelantang sida kelimpah ari kereja.
Sama datai Menijar Pengatur Pengawa Hayati Julihi enggau Menijar Projek ba opis pengatur pengawa Serba Dinamik Sdn Bhd (BIEH) Bintulu, Awang Masbun Pengiran Johari.
Naka taun 2021 tu, Serba Dinamik Sdn Bhd (BIEH) Bagi Menua Bintulu udah ngagihka belanja RM360,000 dikena bejalaika Program Tanggung Pengawa Rama Korporat (CSR) ke alai semua program nya udah mayuh nyaup komuniti menua.
