MIRI: Projek nangkir enggau nyukur tanah ba simpang Jalai Tanjung Taman Bumiko udah mutarka isu kes eksiden ke suah ngujungka bebadi nyawa ba jalai alun pengudah projek nya tembu kena 5 Januari tu tadi.
Pekara nya dikenuku Menteri Perengka Pengangkut Sarawak, Datuk Lee Kim Shin ti madahka nadai agi penusah eksiden ba jalai alun diripotka ba endur nya kenyau ari projek tu tembu kena 5 Januari tu tadi.
“Palan nya dikategori entara endur ke suah ngerikod penusah eksiden ti ngujungka bebadi nyawa ba jalai alun laban jalai ke bisi tiku tajam enggau renjan.
“Tang penusah bebadi nyawa nadai agi diripotka nyentuk diatu pengudah jalai nya disungkur enggau ditangkir,” ku iya lebuh ngabas projek nya, ditu kemari.
Kim Shin ti mega Adun Senadin madahka projek beungkus RM890,000 nya ngaul pengawa nangkir enggau nyungkur jalai, masang lampu signal amber, kutak kuning enggau tiga lampu jalai ngena kuasa solar.
Nambahka nya, projek tu udah dipejalai kena 25 November tu tadi lalu timpuh bejalaika projek nya pengelama 42 hari sereta tembu nitihka timpuh ti udah ditetapka dalam sempekat.
“Kami mega minta raban Majlis Bandaraya Miri (MBM) ngemanahka agi rampa menua ba sitak tu.
“Kebuah pia laban sebedau tu, sekeda pun kayu udah ditebang ngambi ngemuntangka projek nya dipejalai,” terang Kim Shin.
Iya mega minta semua penguna jalai alun ti ngena jalai besai nuju pasar besai nya seruran nitihka atur trafik sereta meda pal tanda ngelingi nya.
“Bala penguna anang ngetu ba kutak kuning sereta meri awak ngagai entukar ari sepiak kiba masuk Jalai Tanjung.
“Enti entukar ba mua lampu trafik nya bejalai, entukar nya mesti nitihka jalai tang enti entukar nya ngetu, pengempu entukar semak simpang Jalai Tanjung mesti meri awak ngagai entukar ti tama Jalai Tanjung,” terang iya.
Ba lansa bukai, Kim Shin madahka opis menteri iya naka ulih nukar lampu trafik ke diatu ngena sistem lampu trafik pintar.
Nangkan nya ku iya, pekara nya udah dipasuk dalam Langgur Pemansang Malaysia Lumpuar Ke-12 (RMK-12) ngambi masang sistem lampu trafik pintar ba selampur Sarawak nyengkaum mengeri Miri.
“Semua lampu trafik dalam mengeri deka ditukar ngagai sistem lampu trafik pintar ti ngena Artificial Intellegent (AI) ngambi ngaduka pejalai trafik nya,” terang iya.
Kelimpah ari nya ku Kim Shin, sistem lampu trafik pinta nya deka mutarka penanggul jalai sekut lalu deka meri timpuh lebih lama ngagai pejalai nya.
