KUCHING: Yayasan Main Asal Dayak (DCF) melanja empat penyereta ba Simposium Pemansik Pelajar Oxford ti diatur ba Universiti Oxford, United Kingdom berengkah ari 12 ngagai 14 Disember tu.
Chairman DCF, Datuk Amar Douglas Uggah Embas madah, pansik ti dipejalai bala penyereta tu siti inisiatif manah dikena nyaguka main asal menua tu ba mata dunya.
“Semina dua pengari ari menua Asia iya nya menua Filipina enggau Malaysia.
“Lebuh beratika keretas pansik sida, metaverse tu subjek kontemporari, nya alai kami chukup temegah laban sida ulih ngarika Sarawak ba Simposium Oxford tu.
“Tu endang berita manah enggau ngemegah. Mayuh main asal, gaya pengidup enggau rampa menua kitai apin dikelala dunya.
“Pemujur program tu dekaka nentuka semua orang ngasaika peneleba baru,” terang iya.
Uggah mansutka jaku nya pengudah nyuaka chek melanja RM53,000 ngagai pengari tim nya, Stephanie Natasha Rich Joseph ba Bilik Aum DCF, Begunan Tun Jugah.
Empat iku pengari nya nyengkaum Stephanie Natasha Rich Jospeh, Daryl Albright, Doubless John, Joyslyn Andrea Jeffry enggau Marcellius Clarence Ley.
