Simunjan pulai nyadi zon kuning

KUCHING: Pelilih Simunjan sehari tu pulai baru status nyadi zon kuning pengudah siti kes baru positif Covid-19 diripot.

Komiti Penyangga Penusah Ngenyit Nengeri (JPBN) nengah sebengkah penerang madah, pekara tu ngujungka enam pelilih menua agi bestatus kuning seraya 34 pelilih agi mengkang ba Zon Gadung.

“Tu kes baru positif Covid-19 pengudah lapan hari bejurut nadai ngerikodka kes positif,” ku iya.

“Nya alai, pekara tu ngujungka bisi 553 kes positif Covid-19 ba Sarawak naka diatu,” terang JPBN.

Terang iya, penyampau kes positif ti udah suman enggau pansut ari sepital mengkang 523 iku tauka 94.58 peratus.

“Berebak enggau nya, bisi 16 Pesakit Dipelaba Kena Rampit (PUI) baru enggau 19 iku agi nganti pemutus peresa makmal.

“Nangkan nya, bisi 558 Pesakit Agi Dipatau (PUS) udah rejister ba hotel ngambi ngurung diri naka diatu,” ku iya.

Ku JPBN, pekara tu ngujungka bisi 1,396 PUS ngurung diri ba 38 buah hotel ba menua tu.

“Bisi 13,283 PUS udah abis timpuh ngurung diri enggau dikemendar pulai ke rumah,” tandu iya.

Suara Sarawak