Singkang Kumang & Co majak gah

SIBU: Bai ati angkunka gari ngundan ukir Borneo, pemungkal Kumang & Co, Norazita Selanie ngepunka butik Kumang & Co.

Ku Norazita, butik iya nya bepun ari Pansik enggau Pemansang (R&D) dipejalai dalam taun 2012 enggau 2013 suba.

Norazita Selanie tauka tampak agi dikangau Zita madahka diri ngembuan tagit deka ngepun dagang mit dulu laban ngasaika diri agi suntuk penemu pasal dagang nya.

Tambah mega lebuh nya ku Zita, iya agi gawa ba sebengkah opis perintah, nya kebuah pandak endar singkang endur ngerembaika dagang ngambika dikelala mensia mayuh.

Zita madah, iya kala nampung pelajar Diploma Kejuruteraan Mekatronik ba Politeknik Kota Kinabalu enggau Sarjana Muda Pengajian Malaysia dan Pendidikan ba Universiti Pendidikan Sultan Idris (UPSI).

MANDING… Baju diudar bala penguna rindu ngena baju tengkebang ari Kumang & Co.

“Pelajar ti diambi aku jauh limpang ari pengawa dikereja aku diatu, tang semua tu bepun ari pengerindu enggau pengangkun diri ngagai ukir Borneo kelimpah ari juluk deka ngansah pengelandik diri.

“Aku mega rindu bekenaka gari ukir Borneo laban ukir nya kelai bansa kitai ti ngujungka aku ngepunka dagang mit. Tambah emga aku chukup rinduka dunya pisin,” ku Zita ngelansa lebuh dirandau Suara Sarawak.

Ba kedai Kumang & Co, sida bisi bejualka mayuh bansa produk ukir Borneo baka pua kumbu, Orang Ulu enggau Penan lalu kain nya digaga nyadi skirt, baju, dress, kaftan, cardigan enggau ke bukai.

Nangkan nya ku iya, produk dijait ari kain nyadi pekayan majak diterima bala penguna bepelasarka timbal enggau sukung chukup manah ari sida ke meli.

“Ari nya tadi aku ngasaika bisi peluang besai ngerembai dagang ba butik Kumang & Co tu laban diatu nadai mayuh rayat Sarawak dipeda aku ngaul diri ba dagang tu,” ku Zita nerang.

KAUL RAT… Zita mega kala ngaul kerejasama enggau pedagang bukai lebuh ngemujur Queen Of Harvest Festival 2019.

“Kenyau ari taun 2014, aku endang udah bisi juluk deka fokus ngagai dagang tu lalu rejister chap dagang ngambi produk ulih rembus ngagai makit entarabansa.

”Kitai berasai chukup betuah laban pengawa dagang seruran disukung Perintah Sarawak enggau ejensi bekaul mantu pedagang ba Dagang Mit enggau Jelan Pemesai (PKS).

Ba jeman moden diatu, mayuh chara ulih dikena ngerembaika dagang lalu kami ngena manah inisiatif disediaka perintah baka ngerembaika dagang nengah media rama, ngaul kerejasama enggau pedagang bukai sereta mensia mayuh ke bisi penau pasal pekara tu.

Nambahka nya, kami mega naka ulih nangkup peminta enggau ngemantupka ati mensia mayuh laban sukung sida ngangkatka dagang Kumang & Co ngagai tikas tinggi agi sereta seruran diterima.

Kenu ku Zita, nitihka atur bedagang di Sarawak, enti deka rejister enggau bisi chap dagang kediri, sida enda tau enda bisi adres kedai.

BEPENAU… Zita mega ngerasukka gari ditengkebang ba kedai iya empu.

Nya alai iya berengkah ngiga ejensi ke bisi nyendiaka bantu ari sukut rejister dagang ti benung dipejalai diatu ketegal berunding deka begunaka puku besai ngemujurka perambu nya.

Ba Kumang & Co, kami bisi tuju dikena ngelakuka produk ngena ukir Borneo nengah bidang pisin ngaul raban indu ti diselinting iya nya raban 40 (B40).

Tuju bukai deka ngenegap raban indu ba pengawa ngelakuka produk bepelasarka ukir Borneo ti bisi kualiti enggau nangkup peminta penguna.

Ba taun 2014, kami bisi ngulu kus Inkubator Mara Sibu, peluang mending enggau ngiri mayuh agi penemu pasal dagang ari sida ti bepeneleba.

Rambau program nya, bala penyereta diajar mayuh bengkah chara ngerembaika dagang sida sekalika dagang mit tauka dagang besai.

MAJAK DIKELALA… Kedai Kumang & Co majak diterima bala penguna enggau udah rembus ngagai renggat entarabansa.

Mayuh pekara dibantai enggau diajar ngambi nemu chara bedagang enggau ngerembaika dagang nya kelimpah ngiri penemu pasal chara begigaka puku enggau chara ngelakuka produk ngambi rembus ngagai makit menua tu enggau menua luar.

“Kami diatu semina bedagang nengah online laban beratka ungkus sereta kualiti kain ti dikena nitihka peminta mensia mayuh.

Kebuah pia, Zita madahka diri ngena manah inisiatif dipejalaika Kepala Menteri Datuk Patinggi Abang Johari Tun Openg pasal ekonomi digital seriris enggau ubah pemansang dunya.

Ku iya, inisiatif Abang Johari tu endang langgur penemu chukup manah lalu patut direbut bala pedagang nyungkak ekonomi kelimpah mai produk muntang agi rembus ngagai makit dunya.

“Berindik ari peminta ke majak nambah ukai semina ba Malaysia aja tang mega ari menua luar, kami berunding deka numbuhka siti agi kedai ngambi bala penguna ulih ngelawa kedai nya kediri empu lalu milih baju dikedeka sida.

“Chukup temegah asai laban kami mujur nyuwa siti lot kedai ba Arked Mara Sibu pengudah nganjung peminta ngagai opis Mara Sibu,” ku iya madahka pengelantang diri.

Ku iya, naka diatu iya semina kala nerima bantu ari Mara Sibu nengah kus inkubator enggau kedai ari Mara.

Nambahka nya ku Zita, iya kala ngulu kus dagang ari ejensi bukai ba menua tu nyengkaum ari Opis Menteri Dagang Entarabansa enggau Industri (Matrade), SME Corps, Institusyen Dagang Menua (INSKEN) enggau Shell.

Zita madah, iya apin kala minjau tauka minta belanja ari sebarang ejensi bekaul dagang ba menua tu lalu dudi hari sida engka bisi ati minta belanja ngagai ejensi enti sema deka nyingkang jauh agi.

Pengawa dagang tu patut dipejalai ari belanja dikemisi kitai enggau pengelandik dikembuan diri empu lalu kitai patut ngansah pengelandik ngelui ari runding diri empu ngambi pintar agi ngepunka dagang, tandu Zita.

“Kitai patut ngembuan pemerani ngatur genap pekara ninting hari enggau anang andalka pinjau enggau subsidi.

“Ambika banding, baka kami ba Kumang & Co, kami semina ngena puku RM1000 aja lalu puku nya tadi dikena belajar bejait nengah group Whatsapp sereta Telegram.

“Naka diatu, kami bisi ngambi pengereja ari bala indai tunggal, pesakit riman sereta nembiak ke apus belajar nyadi tukang jait ba kedai tu,” ku iya nerang seraya madahka sida seruran mantu raban diselinting tu ngansah pengelandik dikembuan.

“Kami diatu bisi ngambi 17 iku pengereja iya nya sepuluh indai tunggal enggau dua pesakit riman sereta lima bini orang nadai kereja nyadi tukang jait ba kedai.

“Kami mega mantu ngelakuka produk pedagang Borneo ti deka nyual produk sida kelebih agi maya roadshow,” terang iya.

Berebak enggau nya, kelimpah kiruh ngajar pengereja enggau ngangkatka kedai, Zita mega kala ngaul kerejasama enggau pedagang bukai lebuh ngemujur pengawa Queen Of Harvest Festival 2019.

“Aku berasai gaga laban kedai Kumang & Co tu udah ngerembai sereta dikelala mensia mayuh ari ukir Borneo dalam bidang pisin ngujungka kami kala nerima beberapa Anugerah kelai ngemegah ukir Borneo ba menua tu.

Dalam taun 2018, Kumang & Co kala nerima Anugerah Emerging Designer of The Year rambau Borneo Fashion Week (BFW).

Pemujur Kumang & Co ukai semina dikerembai ba menua tu tang mega udah rembus ngagai lapan makit entarabansa nyengkaum Brunei, Singapore, Australia, Perancis, Hong Kong, Jipun enggau Thailand.

Kumang & Co udah mujur diangkat nyadi sebagi ari kedai endur ngelakuka produk ukir Borneo ngagai makit menua tu enggau menua luar seraya pemujur tu kelai ukir Borneo menua kitai majak diterima menua luar.

Lebuh berengkah ngereja pengawa kelebih agi ngelakuka dagang, Kumang & Co mega suah napi penguji dalam dunya dagang baka nitihka pemansang teknologi ke majak maju sereta seruran berubah nitih singkang pemansang dunya.

“Kami ditu meseti belajar enggau nyidi penemu bukai nipakka pemansang kemaya hari ba pengawa ngelakuka produk enggau servis baka dalam marketing ulih ngelimatka belanja sereta nentuka produk laku.

Ku Zita, sida mega besemekih enggau bala pedagang bukai ngambi ulih nangkup peminta bala penguna ukai semina ba menua tu tang ba menua luar berindik ari ukir Borneo majak diterima ba serata dunya.

Nya kebuah, kami meseti ngaga enggau nengkebang gaya chura enggau ukir ti baru seraya berundingka penemu ke baru ngambi ulih ngetanka penemu ke diatu.

Ku iya, sida patut ngetanka chap dagang enggau identiti Kumang & Co ngambi seruran nitihka pemansang dunya seraya diterima bala penguna kelimpah ulih tetangkup peminta sida.

Lebuh bedagang, kitai mega patut ngereja tauka bejalaika dagang nyelai ari orang bukai baka ngembuan dagang kediri empu sereta numbuhka pekara ti nyelai ari makit diatu ngembuan buah penemu enggau produk ke baru.

Pekara bukai chukup beguna lebuh ngerembaika dagang kitai nyengkaum chara ngeletak rega ba genap produk iya nya kitai enda tau ngeletak rega kelalu mar ngambi produk nya dikerindu enggau ulih dibeli bala penguna sereta setipak enggau bisi kualiti.

Berebak enggau nya, kitai patut beratka kualiti enggau peminta penguna sereta agi setipak enggau ungkus ngaga genap produk dijual nya.

Zita nangkan semua kitai anang ngira penguntung aja lebuh bedagang tang genap produk digaga patut berundingka peminta enggau tikas idup mensia mayuh ba menua tu.

“Ambika chunto, sida ngepunka dagang ketegal ngasaika diri ukai datai ari ruang bilik ti bepenatai pemisi kelimpah deka ngubah pengidup sida menyana agi.

“Bepun ari nya, kami bekerejasama enggau bakih kunsi baka indai tunggal, pesakit riman kelimpah mantu raban diselinting ngambika ulih ngiga belanja lebih nupi sida sebilik.

Zita mega kala dikangau nyadi pengelicha ba sebengkah program ngambi meri sanding penemu ngagai pedagang ti ngepunka dagang sida kelimpah diaku nyadi Ikon Dagang begulai enggau pedagang bukai ba menua tu.

“Lebuh ngaul kerejasama, kami ngajar sida chara keterubah dataika kepenudi pansut ari pengidup diasaika sida diatu, ngubah chara sida berunding awakka sida ulih mansang baka orang bukai,” terang iya.

Kami berasai chukup gaga laban udah mantu raban diselinting tu seraya ulih nyukung enggau ngansah pengelandik dikembuan sida ngelama tu.

“Ba penemu aku, nyadi orang dagang tu kitai patut ngembuan enggau runding positif, ngembuan pemerani ngaga dagang enggau inovasyen ke baru.

Kitai mega patut ngelimatka belanja lebuh bedagang, ngembuan identity kediri empu sereta enda nitihka asil tauka abi jari orang bukai lalu rinduka utai diaduka kitai ngambi dagang nya ulih dikemansang seikas entarabansa.

“Lebuh ngepunka dagang, kitai patut berengkah ari utai dikemisi, pengelandik enggau pemerani dikembuan kitai ngambika dagang nya mengkang taja dunya majak berubah,” simpul Zita.