Sinu, anak mit baru ada ditemu ba pun pisang

SIBU: Munyi sabak mujur nyelamatka nyawa siku anak mit ti ditinggal ngapa lalu ditemu siku lelaki ditu, pagi tadi.

Nitihka sebengkah penerang, anak mit ke dipelaba baru ada lebuh ditemu nya agi mengkang temuni enggau ditinggal ba baruh pun pisang semak rumah lelaki nya.

Ketuai Polis Pelilih Sibu, ACP Stanley Jonathan Ringgit madahka siku lelaki beumur 45 taun ti keterubah tetemuka anak mit nya terus madah ngagai polis pengudah tetemuka anak mit indu nya urung pukul 9.30 pagi.

“Iya ngiga nyawa anak mit nyabak nya nyentuk tetemuka anak mit indu ke agi betali pusat ba baruh pun pisang nya,” terang iya lebuh dirandau, ditu tadi.

Stanley madahka lelaki nya mai anak mit baru ada ngagai rumah lalu meri mandi sebedau meri anak mit nya ngagai polis ba Balai Polis Sibu Jaya.

“Anak mit nya dibai ngagai Sepital Sibu ngambi diperesa,” terang iya.

Kelimpah ari nya, kes tu dipansik di baruh Seksyen 317 Kanun Keseksaan.

Suara Sarawak