Sinu betatika jari ngepai minta tolong lebuh tengelam

SEBUYAU: Sekeda jaku dipansut sebelah media rama ti ngumbai raban feri ngasuh entukar 4WD surut ketegal udah sarat nya bula, ku jeragan Feri Triso, Kurmi Denan.
Kurmi, entara saksi penusah nya madahka takah sida urung 30 ke 40 meter ari tiang penyangkai feri.
“Terubah nya, aku nadai meda entukar ba jalai.
“Tang lebuh malik baru, dia aku meda sebuah entukar nurun taja feri empai sangkai,” ku iya ngenang penusah ke nyadi dia lemai kemari.
Kurmi madahka diri chukup sinu lebuh meda jari siku ari sida ke dalam entukar nya ngepai minta tolong.
“Aku nyau remban demalam laban agi ingatka penusah nya.
“Runding nadai ke bukai tang betatika sida ke lemas ditabanka entukar tengelam ke dalam ai,” ku Kurmi.