KUCHING: Pengawa bejadika sistem e-utiliti deka ngemanah agi sistem enggau servis opis menteri ulitili sereta ejensi dipegai iya, pia ku Menteri iya Datuk Seri Dr Stephen Rundi Utom.
Rundi madahka sistem nya endang juluk Perintah Sarawak laban dekaka menua tu ngena teknologi digital.
“Bisi orang madahka sistem enggau servis kami apin ngemantupka ati laban pengawa macha meter enggau ke bukai nadai agi dipejalai ketegal kurang staf ngereja pengawa nya.
“Nengah pemisi sistem e-utiliti tu, semua ulih dipejalai nengah digital nyengkaum macha meter utiliti penguna,” terang iya.
Rundi mansutka jaku nya ba pengawa bejadika Pelin Anti Makai Suap Organisasyen (OACP) 2021-2025 Opis Menteri Utiliti enggau sistem e-utiliti di Dewan Auditorium Menara LCDA, ditu ensanus.
Ku Rundi, opis menteri iya mega numbuhka palan matau pekara ke nyadi.
“Kami ngarapka penumbuh palan matau nya tu ulih matau pekara ke nyadi kelebih agi penanggul bekal ai tejanggal enggau kuasa karan ke suah meri penusah ngagai mensia mayuh,” terang iya.
Rundi madahka pemuntan meri timbal ngagai mensia mayuh bekaul penanggul tauka isu bekaul utiliti ke suah disebana bala penguna enggau nyalahka perintah.
“Nya alai, aku minta semua staf kelebih pegawai ngambi meri kerejasama enggau sikar mutarka sebarang sebana tauka isu tu.
“Kebuah pia laban utiliti nya pekara besai lalu kita gawa ukai semina nerima gaji ninting bukai tang mesti bejalaika pangku pengawa ke udah dilempai ngelama tu,” ku Rundi nyemetak madah.
Rundi mega madahka opis menteri iya ulih mutarka semua penanggul enggau isu diasaika rayat manggai taun 2025 nengah pemisi sistem digital enggau elektronik tu.
