Sistem pelajar Malaysia udu berubah

Taja pia ukai reti kitai puntan tang dikena ngemanah agi sistem pelajar ke udah digaga

KUCHING: Sistem pelajar ba menua Malaysia ukai siti sistem ti enda mujur sereta enda begunaka ubah ninting hari.

Direktor Opis Pelajar Malaysia, Datuk Dr. Amin Senin madah sistem pelajar ba menua tu sigi bisi pengurang sereta enda chukup nitihka peneka maya diatu, tang nya ukai siti pekara ti tau dikumbai enda mujur tauka puntan.

“Aku ngaku sistem pelajar ba menua tu endang bisi pengurang tauka penimpang iya empu, tang nya enda patut dikumbai kitai enda mujur.

“Pinta bala mayuh ngasuh ngubah sistem pelajar tu chukup tinggi, lebih agi madahka sistem pelajar kitai tu patut diubah ninting hari ketegal berati ubah ari sukut teknologi menua luar,” ku iya.

KELAI…. Dr Amin (dua ari kanan) bejadika pengawa Konvensyen Pelajar Nasional Ke-25 enggau Aum Pengari Serakup Kaunsil Kepala Pengajar Malaysia Ke-37.-Gambar Ramidi Subari.

Dr Amin madah nya lebuh pengawa bejadika Konvensyen Pelajar Nasional Ke-25 enggau Aum Pengari Serakup Kaunsil Kepala Pengajar Malaysia Ke-37 ba siti hotel tebilang ba ditu, kemari.

Dr Amin mega nambah bisi dua bengkah kategori ubah dalam sistem pelajar ti nyengkaum ubah enggau jampat sereta ubah ti dikena dalam jangka masa ti lama.

“Enti ubah ba sistem pelajar nya patut digaga enggau jampat, kitai patut beratika pekara ba ubah nya ulih dipejalaika ba Malaysia.

“Lalu enti ba ubah ti beguna ngambi ulih dikena dalam timpuh jam ti panjai, tu nyengkaum ubah ba budaya laban nya ngambi masa dikena orang meretika ubah nya, bejalaika ubah nya lalu udah nya baru ubah nya ulih nerenak semangat enggau pengering kitai,” ku iya.

Ba pekara bukai, iya nangkan ngambika bala mayuh enda terus ngambi menua luar nyadi chunto dalam pemansang pengawa pelajar, tang meri fokus ngagai chara mansutka rayat ti bepenemu seriris enggau guna serta peneka menua tu.
Urung 822 iku Kepala Pengajar ari selampur Malaysia bisi ngulu pengawa Konvensyen Pelajar Nasional Ke-25 enggau Aum Pengari Serakup Kaunsil Kepala Pengajar Malaysia Ke-37 ti dipejalaika 8 ngagai 12 April nya.

Suara Sarawak