Sitak Dudong udah maju

SIBU: Rumah panjai sitak Dun Dudong diatu udah disikap 99 peratus rentayan infrastruktur pemun baka jalai alun, ai paip enggau bekal kuasa karan.

Pekara tu diaku Adun Dudong Datuk Tiong Thai King ari perati iya empu pengudah nyauka lima taun nyadi pengari rayat ba sitak nya ke alai sebedau tu kala nyadi Kaban Parlimen Lanang pengelama lima penggal.

Ungkup penerang, sitak Dun Dudong di baruh pegai Parlimen Lanang ti semampai dikemansang ngelama tu.

“Aku berasai lantang ati laban 99 peratus rumah panjai ditu udah disambung jalai alun, bekal ai beresi enggau kuasa karan ari grid besai.

“Pemujur projek pemansang ungkup kandang menua pesisir Dudong ngayanka kaul rat entara semua, bekerejasama sereta ngiga runding ungkup pengelantang begulai,” ku iya.

Tiong mansutka jaku nya lebuh ngulu Pengerami Ngintu Hari Krismas ba Rumah Penghulu Sandom Sobri, Sungai Pak, semak ditu, kemari.