KUCHING: Perintah Sarawak merambu nambahka sitak Dun enggau Parlimen dudi hari.
Speaker Dun, Tan Sri Mohamad Asfia Awang Nassar madah, pekara nya endang dalam perambu sida nitihka data enggau statistik pemadu baru dikeluarka Opis Perangkaan Malaysia.
“Sitak Dun enggau Parlimen patut ditambah tauka berapa nambah nya bepanggai ngagai statistik enggau data.
“Baka Dun Senadin enggau Tupong ke ngerikod rayat pemadu mayuh, engka mesti diperati enggau diseriris baru enggau nambah sitak Dun baru,” ku iya.
Asfia mansutka jaku nya pengudah bejadika Pejalai Parlimen enggau Dun: Penemuan Utama Banci Malaysia 2020 sereta Pemansut Kasar Dalam Menua (KDNK) 2021, Sarawak kemari.
Taja pia ku iya, pengawa nambahka Dun tauka Parlimen nadai dipejalai maya Pengawa Bepilih Besai (PRU) tauka Pengawa Bepilih Nengeri (PRN) ke deka datai.
Mudah aja nambahka sitak Dun tang penanggul ditapi kitai diatu pengawa nambahka sitak Parlimen baru mesti dikemendar Dewan Rakyat tang diatu Sarawak nadai sada majoriti dua pertiga din,” ku iya.
Ngelansa silik, Asfia madahka suba Perintah Sarawak udah nyendiaka 108 penuduk Dun maya Dun Sarawak ditumbuh.
“Kebuah pia laban kitai nemu enggau melaba timpuh Dun tauka Parlimen abis nadai 50 taun, nya kebuah pengudah nyapai tikas nya begunaka ubah.
“Kami udah sedia enggau nemu Dun di Sarawak abis nadai 108 sitak,” ku iya nerang.
Naka diatu, Sarawak bisi 82 sitak Dun enggau 31 sitak Parlimen.
Lebuh ditanya pasal perintah beratika baru Artikel 17 Perlembagaan Sarawak pasal Akta Antilompat Parti, iya madahka pekara nya deka diputar enda lama agi.
“Pekara nya enda ibuh dipejurai ba Aum Dun bulan November tu. Haribulan nya jauh laban kitai deka mutarka pekara nya lalu pemutus deka ditemu enda lama agi,” ku iya.
Kena 6 Ogos tu tadi, Premier Sarawak Datuk Patinggi Tan Sri Abang Johari Tun Openg madah, menua tu udah bisi atur di baruh konstitusyen pasal ulah merejuk parti.
Tang nya enda ulih dipejalai laban besibil enggau Artikel 8 Perlembagaan Persekutuan.
Nya alai, pansik ari Luyar Besai Nengeri Sarawak nya deka beratika baru atur nya seriris enggau akta ke udah dikemendar ba Parlimen.
