KUCHING: Perintah Sarawak andal tiga pekara ti ditagih ari Perintah Besai ulih dipenggi dalam taun tu, ku Premier Sarawak Datuk Patinggi Tan Sri Abang Johari Tun Openg.
Ku iya, pekara keterubah ditagih Perintah Sarawak senentang Penyangkai Kapal Bintulu lalu kedua nya pasal ngambi serikat penerebai MASwings.
Taja pia Premier Sarawak enggai nyebut nyemetak pasal pekara ketiga ti ditagih lebuh ditanya raban pemberita.
“Tiga pekara ti benung dikerandauka kitai lalu engka deka diberi pulai ngagai Sarawak, keterubah nya Penyangkai Kapal Bintulu, kedua MASwings, lalu ketiga nya anti dulu,” ku iya.
Abang Johari nyebut pekara nya lebuh dirandau pemberita lebuh ngulu Pengerami Ngintu Genap Taun Ke-5 Unit Komunikasi Awam Sarawak (UKAS) ba sebuah hotel tebilang ditu, malam tadi.
