KOTA SAMARAHAN: Pengawa ngulih penemu ba sekula ti mimit nembiak ba menua ulu enda nagang nembiak Sekula Primari (SK) Batu Bungan chakah ngemansangka diri ba pelajar kelebih agi ba pengawa teknologi.
Bala nembiak enggau pengajar ba SK Batu Bungan ti datai ari pelilih Baram bela masuk Pekit Malaysia Techlympics ti diatur Opis Menteri Sains, Teknologi enggau Inovasyen (MOSTI) ba Universiti Malaysia Sarawak (UNIMAS) ditu, ensanus.
Pekit nya sebengkah inisiatif MOSTI dikena narak minat rebak biak ngagai Sains, Teknologi, Injiniring enggau Matematik (STEM) nengah pelasar pekit ti ngerinduka ati.
Pengajar Subjek Sains sereta Subjek Reka Bentuk dan Teknologi (RBT) SK Batu Bungan, Joseph Bansa, 32, ti bebansa Iban madahka diri temegah meda nembiak sida ti datai ari menua ulu masuk Pekit Malaysia Techlympics.
Joseph mansutka jaku nya lebuh dirandau pemberita rambau Pengerami Minggu Sains Menua (MSN) 2023 Renggat Nengeri Sarawak enggau Malaysia Techlympics 2023 Renggat Zon Sarawak.
“Baka ditemu kitai, sitak menua ulu ngelingi Taman Negara Mulu semina ulih dilawa ngena jalai sungai sereta ngambi timpuh urung lapan jam dikena ngenataika diri ba Marudi enggau 30 minit ngena bilun.
“Pekara tu endang penguji besai ngagai bala kami ti ngajar ba sekula tu masuk Pekit Malaysia Techlympics,” terang iya.
Iya mega madah, bisi lima pengajar ngembing 16 nembiak ari sekula sida masuk pekit nya.
“Aku enggau bala pengajar bukai mai nembiak ari sekula kami ngulu pekit tu ngena bilun ari sitak Taman Negara Mulu ke Miri lalu ari Miri, aku enggau dua agi pengajar bukai deriba dua buah entukar bansa Toyota Hilux enggau sebuah Perodua Axia.
“Pejalai ngelawa pekit tu urung 14 jam enda ngetu lalu kami semina ngetu makai enggau ngirup aja.
“Kami pen bisi betelefon ngagai raban pengatur Malaysia Techlympics enggau UNIMAS bekaul penanggul ditapi kami lebuh nganjung bala nembiak kami masuk pekit tu.
“Kebuah pia ngambi sida beratika pengeransing kami masuk pekit tu sereta ngarap sida ulih mantu kami ari sukut belanja,” ku iya.
Ungkup penerang, SK Batu Bungan udah nganjung 16 nembiak ti bebansa Penan, Iban enggau Bidayuh masuk Pekit Malaysia Techlympics 2023 ungkup pekit TacoBot enggau Entukar Meruan.
Pia mega, ku iya, pengawa mai nembiak ari menua ulu masuk pekit nya dikena meri peneleba ngagai sida bekaul STEM.
