SK Kampung Penasu deka digaga baru nengah Projek Rayat

DARO: Perintah Sarawak deka ngaga baru Sekula Primari (SK) Kampung Penasu beungkus RM35 juta.
Projek ngaga baru sekula nya di baruh Projek Rayat deka ngamatka juluk ati peranak dia.

Adun Daro, Safiee Ahmad madahka projek nya dikemendar Kepala Menteri Datuk Patinggi Abang Johari Tun Openg lebuh ngatur pejalai nemuai ngagai Kampung Penasu dalam taun 2018.

Ku Safiee, projek ti udah dikemendar tu ngayanka Perintah Sarawak keran negapka pekara pelajar di menua tu kelebih agi ba menua pesisir.

“Tu mega mandangka Perintah Sarawak beratka pekara pelajar di menua tu.

“Kitai bela nemu, pekara pelajar nya di baruh bidang kuasa Perintah Besai.

“Tang Perintah Sarawak sanggup mayar panjar RM1 bilion ngambi agih belanja nya ulih nyaup ngerumban pengawa nyeleti sekula repuk di Sarawak,” terang iya.

Safiee mansutka jaku nya pengudah ngatur pejalai ngabas taba projek sekula nya, apin lama ke udah.
Ku iya, sekula nya ulih nyendiaka pelajar ngagai nembiak ari Kampung Penasu nyengkaum nembiak ari semilan buah rumah panjai semak dia.

“Semua projek ti dikemendarka Kepala Menteri rambau penemuai iya ngagai genturung pendiau tu ba taun 2018 udah dipejalai nyengkaum projek nyeleti jalai beungkus RM170 juta.

Kepala Pengajar SK Penasu, Ibarahim Abang Mahmud madahka iya nerima manah pengawa ngaga baru sekula tu.

Suara Sarawak