SARIKEI: Pelasar baru skim nangkir kampung ti ditumbuhka Perintah Sarawak nyendiaka lot rumah ti lebih meruan ngagai rayat.
Menteri Muda Pemansang Mengeri enggau Pengeraja Asal Datuk Len Talif Salleh madahka nengah skim tu perintah ngatur pemansang enggau lebih manah bagi ngelempungka tating peranak bukai kelimpah nyendiaka palan diau ti lebih menyana.
Ukai semina jaku aja, skim nya mega disikap enggau mayuh perengkaguna pemun baka jalai alun, sistem parit, bekal ai enggau kuasa karan.
“Pengeransing perintah tu udah meri pangka besai ngagai rayat dalam timpuh panjai.
“Nya mega nandaka perintah meri perati ngagai rayat sereta deka ngiga chara pemadu manah ungkup sida,” ku iya bejaku rambau program nyerahka Lot Rumah Skim Nangkir Kampung di Selalang.
Penyampau 84 iku peranak nerima lot rumah sida dalam program nya ke diatur ba Balai Mensia Mayuh di Kampung Selalang.
Skim Nangkir Kampung Selalang nyendiaka 152 lot rumah lalu ari penyampau nya perintah udah ngemendarka 84 lot.
Sebagi ari nya udah diberi ngagai penerima apin lama lalu 42 lot ke bukai deka diserah ngagai penerima enda lama agi.
Nangkan nya, laluh lot ke bedau diagihka agi bisi 68 lot.
Sama bisi datai Kaban Parlimen Tanjung Manis Ir Yusuf Abd Wahab, Pemesai Pelilih Menua Sarikei Christopher Ranggau, Penguasa Tanah enggau Survei Sarikei Thian Choon Kui, Penghulu Amir Kupon enggau Penghulu Bidai Ngisang.