Skim RES nerima agih RM1.398 bilion

KUCHING: Perintah Sarawak ngagihka belanja RM1.398 bilion nengah Skim Bekal Kuasa Karan Menua Pesisir Sarawak (RES) ungkup taun baru.

Kepala Menteri Sarawak Datuk Patinggi Abang Johari Tun Openg madah, agih belanja nya deka diagih nengah Inisiatif Belanja Alternatif Negeri.

“Pekara tu setipak enggau juluk Perintah Sarawak nentuka selampur menua nadai tinggal ari projek kuasa karan ke benung dipejalai diatu.

“Pia mega, agih belanja tu dikena mutarka penanggul pasal servis dikenatai enggau naka pengelengkas,” ku iya.
Abang Johari mansutka jaku nya lebuh bejuraika Bajet Sarawak 2021 ba Aum Dun, ditu tadi.

Nambahka nya ku iya, peranak ba menua pesisir mega deka nerima bantu dikena nyambung bekal kuasa karan ke rumah sida ti dipejalai nengah Agih Belanja Peminta Tambah Lebih (Alaf) enggau Skim Sambung Karan Dibantu (AWS).

Ba lansa sama, Abang Johari madahka perintah deka nampung bantu nyambung kuasa karan ke rumah ungkup peranak ba mengeri taun baru tu.

“Pekara tu dipejalai nengah Connection Charges Government Financial Assistance (CCGFA) ngena agih belanja penyampau RM2.3 juta nengah Bajet Sarawak 2021 tu,” terang iya

Suara Sarawak