AICHI-NAGOYA: Tim skuasy indu nasional mujur masuk ngagai renggat final pekit tim indu ba Lumba Asia Aichi-Nagoya 2026 pengudah ngalahka Jipun 2-0 ba renggat semi-final di Nagoya Kinjo Futo Arena ensanus.

Pemujur nya mai Malaysia sesingkang da ari ngetanka midul emas ke diulih ba Lumba Asia Hangzhou tiga taun ke udah.

Pemain tunggal nasional S. Sivasangari bulih poin keterubah lebuh ngalahka Satomi Watanabe ba lima idar bermain.

Sivasangari alah ba main idar terubah 5-11 tang angkat baru lalu menang 11-7 ba main kedua.

Pemenang midul emas tunggal nya tinggal baru pengudah alah ba main ketiga 5-11, tang mujur menang ba dua main ke nangkanka nya 11-6 enggau 11-3.

Udah nya Aira Azman ngenukuka Malaysia masuk final lebuh ngalahka Akari Midorikawa enggau gol 11-8, 11-5, 11-3 ba pekit kedua.

Pemujur 2-0 nya ngenukuka penuduk Malaysia ba renggat final, ti diperambu diatur pagila.

Malaysia deka ngelaban Hong Kong ba pekit berebutka midul emas pengudah tim nya ngalahka India 2-1 ba semi-final ke bukai. – STADIUM ASTRO