ARTIKEL

Snowdan minta PRS ngena sistem demokrasi

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Raban Nembiak Parti Rakyat Sarawak (PRS) ngarapka pengawa bediri minta pilih tebuka ba penuduk besai parti deka diatur maya Konvensyen Pengari Tiga Taun Sekali (TDC) deka datai.

Tuai Nembiak PRS, Datuk Snowdan Lawan nya dikena negapka sistem demokrasi parti.

Kelimpah ari nya ku iya, sida mega bisi bala tuai ti tegap enggau entap penemu ngemudi ke parti nya.

“Ngena chara tu, kitai deka meri peluang ngagai semua kaban nengah sistem demokrasi enggau kaban parti deka ngasaika sida bisi tuai ti kering.

“Dudi hari, kitai agi begempung tang sebarang parti tentu begunaka tuai ti kerning ngemudi ke parti tu,” ku penemu iya.

Snowdan nibar ke penemu nya ba Pengerami Nyuaka Perais Dayakdaily’s ‘Gastronomy and I: My Favourite Dish’ Writing Competition di Hotel Imperial ditu tadi.

Iya ti mega Sapit Menteri Industri Kreatif enggau Seni Pemerindang madah, penanggul dalam parti udah diputar ngaul berita dibai angin madah ke bisi pengawa berebutka kuasa entara kaban parti.

Iya ngenyemaka pengawa berebutka kuasa parti dikerembai nya baka gaya pekit bemain bul ke alai bisi dua tim bemain ba padang lalu berebut deka menang.

“Bida penemu dalam parti politik nya pekara ke suah nyadi baka selama lalu dudi hari ila, kaban parti deka duduk betunga ngempung penemu.

“Kepenudi pengawa nya dikereja lebuh ex-presiden Tan Sri James Jemut Masing midang, semua nemu bisi sekeda tuai deka ngisi penuduk presiden tauka ngemudi ke parti.

“Tang ujung iya, kami selubang penemu, ari randau, runding enggau ngempung penemu chara manah,” ku iya.

Berebak enggau nya, Snowdan madah ke Kaunsil Supreme PRS deka ngaga pemutus nyiri pangku pengawa dalam parti maya TDC deka datai.

Ku iya, pekara nya patut dikerandau entara kaban Kaunsil Supreme sekali ke pangku pengawa besai dalam parti deka dipekit baru tauka ditan.

“Ba PRS, bisi urung 30 pangku pengawa dalam parti lalu kitai patut berandau enggau pangan diri dikena nentuka semua setuju lalu nya kebuah sekeda pangku pengawa deka ditumbuh,” terang Snowdan.

Ungkup rikod, TDC PRS sebedau tu diatur kena 23 enggau 24 April 2022 ke alai parti nya ngetanka status quo ungkup kaban kaunsil supreme sida.

Berebak enggau nya, Datuk Joseph Salang Gandum udah nyadi presiden parti kenyau ari pemidang Masing kena 31 Oktober 2021.

BERITA LAIN

BERITA TERBARU