PAKAN: Serakup Pengereja Pengawa Minyak enggau Gas Sarawak (Sogwa) udah mujur nyain Sempekat Pemereti Ati (MoU) enggau Sarawak Skills ti meri empas besai ngagai sektor minyak enggau gas ba menua tu.
Ba kerejasama tu, raban Sogwa kelebih agi anak Sarawak deka bulih pemaik laban deka diberi latih tambah ba pekara nya.
“Enti ngelama tu, palan latih ti diaku jarang amat bisi kaul enggau gerempung ukai dikuasa perintah (NGO).
“Tambah mega, Sogwa ke mega NGO baru ditumbuh ba timpuh lima taun mujur nanggam kerejasama enggau Sarawak Skills tu.
“Kami berasai temegah ati laban Mui Lee Enterprise mega bela nanggam kerejasama tu,” ku Presiden Sogwa Tedong Chakaw.
Iya mansutka jaku nya ba Pengawa Nyain MoU enggau Sarawak Skills di Miri, malam ensanus.
Tedong madah, Sogwa endang ngembuan juluk ati bekerejasama enggau mayuh palan latih pengelandik ba Malaysia kelebih agi ari menua Sarawak.
Ku iya, kerejasama tu engkeman amat dikena nambahka pengelandik sereta nangkup peminta makit kereja ti begunaka pengereja landik ba industri minyak enggau gas Sarawak.
