KUCHING: Raban soldadu veteran ti kala gawa enggau Serakup Bansa Bersatu (PBB) patut dibasa laban udah bebendar nyaga pengelikun menua.
Presiden Gerempung Veteran Soldadu Kor Renjer (PVTKR) Leftenan Kolonel (B) Mohd Melintang Abdullah madah sida tu entara orang ke udah gawa ba pegai PBB ari taun 1948.
“Aku chukup temegah laban ulih nyadi siku ari raban sida ti nyaga pengelikun menua sereta gawaka organisasyen tu betaun pengelama ti udah.
“Mayuh bala veteran ari Sarawak ti udah kala gawa dalam operasyen serakup tu lalu sekeda ari sida tu mega udah bebadi nyawa lebuh gawa ba baruh pegai PBB,” ku iya madah nengah sebengkah penerang berita.
Melintang siku ari sida veteran udah kala meri servis nyadi Pemansik Soldadu PBB ba menua baka Liberia, Sudan, Somalia enggau Bosnia sereta nyadi Pemesai Pekara Penyambung (Liaison Officer) PBB ngagai Serakup Afrika.
Nangkan nya, ku iya, iya meri besai basa ngagai tiap iku veteran sereta sida sebilik ti udah bebadi nyawa lebuh gawa meri servis ngaga PBB.
“Naka ke diatu, penyampau 14 bengkah operasyen penyaga pengelikun digaga ba empat bengkah benua benung dipejalaika ari 124 bengkah menua ti betuaika PBB.
“Malaysia dikelala nyadi siti menua ti penuh enggau penyayau laban bisi komitmen sereta chakah dalam pengawa nyaga pengelikun ba menua ti suah dituntung mayuh penguji,” ku iya madah.
Lalu kenaka 29 Mei tu tadi, siti hari dunya udah ditetapka dikena ngingat tiap iku penyaga pengelikun ba baruh pegai PBB sereta udah bebadi nyawa lebuh ngetanka pengelikun dunya.
Ungkup penemu PBB sebengkah serakup entarabansa ti ditumbuhka ba San Francisco, California kena 24 Oktober 1945 lepas Perang Dunya Kedua.
Kaban serakup tu tebuka ngagai semua menua di dunya. Juluk besai enggau tuju serakup ditumbuh dikena nyeliah laya besai, ngintu hak mensia, nyamin ulah bebasaka undang-undang entarabansa sereta ngangkatka tikas pengidup rayat ba serata dunya.
PBB mega ditumbuh dikena nukar Liga Bansa-bansa ke udah dipadam ketegal puntan nagang Perang Dunya Kedua. Indu Opis asal PBB bepalan ba San Francisco, tang betukar palan endur ngereja pengawa ngagai Mengeri New York ti nyadi indu opis kenyau 1946 nyentuk diatu.
