Soldadu wataniah sedia mantu nyaga adan menua

SEMATAN: Soldadu wataniah seruran sedia meri bantu ngagai piak penyaga pengelikun nagang pengerekai Covid-19 ba adan menua tu.

Komander Rejimen 511 Askar Wataniah Brigedier Jeneral Abang Mohamad Abang Marzuki madah, pengawa nyaga adan menua kebendar ukai dibaruh bidang kuasa piak sida.

“Taja pia, kitai bisi kaul enggau pengawa nyaga adan lebih agi maya bisi penyakit Covid-19.

“Kitai deka mantu meri penerang nyengkaum pengawa salah, sebarang aktiviti belalai ba adan menua,” ku iya.

Iya madah munyi nya ngagai pemberita pengudah bejadika Pengawa Baris Genap Taun Ke-40 Rejimen 511 Askar Wataniah ditu kemari.

Kenu ku Abang Mohamad, tanggungpengawa nyaga adan menua Sarawak endang dibaruh kuasa Briged Ketiga Infantri.

“Tanggungpengawa kitai tu lebih ngagai meri penerang ngagai piak atas nyema bisi tetemuka sebarang aktiviti ke nyelai tauka ngeruga pengelikun menua baka mai senapang.

“Tambah mega kitai nadia kuasa neritka atu tang ulih ngenataika ripot aktiviti ke ditemu ngelanggar undang-undang ngagai pemesai tauka markas rejimen.

Tandu iya, pengudah ngaga ripot, nya tepulai ngagai piak rejimen beratika sekalika patut ngaga pansik tauka ngiga penerang enggau silik.

Iya mega madah tanggungpengawa besai soldadu wataniah endang nulung pengawa raban soldadu Briged Ketiga Infantri nyema bisi penyarut tauka perang.

“Soldadu wataniha tu endang tim penabat sempama baka main bol bisi pemain tetap (soldadu briged) enggau bisi pemain rizab (soldadu wataniah).

“Nya alai, kitai seruran nyikap diri enggau seruran ngatur latih ninting bulan,” ku iya.

Sebedau tu, perintah Indonesia nganjung 238 peranak menua sida ke datai ari menua Hubei, China, ke Pulau Natuna awakka diperesa sereta dikurung (kuarantin) pengelama 14 hari.

Ungkup penemu, Pulau Natuna bepalan enda jauh ari adan menua Malaysia enti nengah Sematan, Sarawak.

Sekeda media dalam menua dipadahka dianjung ngena tiga buah bilun engkabang soldadu ngagai Pulau Natuna, Provinsi Kepulauan Riau ke bepalan ba Tasik China Selatan.

Presiden Indonesia Joko Widodo diripotka ngasuh rayat iya ba Wuhan enggau ba Hubei, dibai pulai ke Indonesia, bekau ari pengerekai penyakit Covid-19.

Suara Sarawak