Sonita pegari baka panchar bulan mingkai

Kumang Gawai SDNU Kapit 2019

KAPIT: Pemutus akim milih Sonita Sinda Edin menggi gelar Kumang Gawai SDNU Kapit 2019 endang patut enggau engkeman ngalahka semilan pemekit bukai.

Chukup ngepan, bajik baka bulan pegari diganding enggau bepenau sereta bepenemu ke alai Sonita mujur narit ati bala akim ti diketuai Sapit Residen Kapit, Galong Luang.

Sonita ke peranak asal Rumah Langut, Nanga Teliai, Sungai Entaloh pulai ngemai perais mata duit disempulang jumpang, segupung bungai, hamper, trofi, setipikit sereta pemeri bukai.

Seraya Nantai Sain menggi gelar Lulong ba penuduk lumur dua enggau penuduk ketiga iya nya gelar Selinggar Matahari dipenggi Rosita Gunong.

TIMPAI KENANG… Bala pemenang Pekit Kumang Gawai Dayak SDNU Kapit begambar bebala mayuh disempulang bala bukai atas panggau nyadika kenang dudi hari.

Seduai bela nerima perais mata duit, segupung bungai, trofi, hamper enggau setipikit enggau pemeri bukai ari raban pengatur pengerami nyadika kenang jemah.

Nantai Sain peranak Rumah Sekudan, Ulu Pelagus gawa nyadi pengajar di SK Nanga Bawai lalu Rosita Gunong datai ari Rumah Nulang, Sungai Temalat Song.

Pekit Kumang Gawai Dayak diatur beserimbai enggau Pengerami Makai Lemai Mantar Gawai 2019 di Dewan Suarah Kapit ditu lemai Hari Enam tu tadi.

Sama datai bini MP Datuk Alexander Nanta Linggi, Datin Angelina Celestine Ujang, bini MP Hulu Rajang Datuk Wilson Ugak Kumbong, Datin Letya Kupa , bini Adun Pelagus Wilson Nyabong Ijang, Seriah Thomas enggau Pemesai Pangatur Pengawa Opis Pelilih Kapit Bidah Lujah.

Komiti pengatur meri pesan selamat ngintu Gawai Dayak sereta meri tabi puji ngagai semua pemenang enggau penyereta pekit.

Sida mega ngarapka semua bela mujur ba pengawa dikereja lalu terima kasih ke sukung tegut nentuka pemujur atur pekit.

Belalauka jaku sida ke tuai, bejalai betungkatka adat, tinduk bepanggalka pengingat laban kitai bansa endang dikelala orang ari penempa gaya idup enggau adat, nipakka sempama dikelala daun ari kayu, dikelala buah ari langgu enggau dikelala bansa ari jaku.

 

KUMANG… Sonita (duduk, tengah) diapit Nantai (bediri kiba) enggau Rostia (bediri kanan) pengudah nerima perais di atas panggau.

 

NGERAMI GAWAI… Bala temuai dipebasa bela nyeradakka ai pengayu atas panggau.