SOP ba lus pengereja deka dikerandau enggau JPBN

BETONG: Pengawa nyendiaka lus pengereja ti nitihka Standard Atur Pengawa (SOP) ba tiap taba projek entara pekara tambah ti deka dikerandau silik begulai enggau Komiti Penyangga Penusah Ngenyit Nengeri (JPBN).

Kepala Menteri Datuk Patinggi Abang Johari Tun Openg madah, empas pandemic Covid-19 dekaka perintah beratika baru enggau ngemanah SOP nyengkaum ba taba projek nitihka chara idup baru.

“Nya kebuah, aku datai kitu ngambi beratika utai ti nyadi ba taba projek lalu kitai ulih ngemanah perengkaguna ke meseti disedia ngagai bala pengereja.

“Kami udah berandau enggau udah tu deka berundingka pekara tu enggau JPBN ngambi genap taba projek bisi disediaka luspengereja,” ku iya madah ngagai pemberita pengudah ngabas taba projek ngaga Jematan Sungai Krian enggau Batang Saribas, ditu tadi.

Terang iya, lus nya endur bala pengereja sereta meseti digaga nitihka SOP.

“Bala pengereja ti diau bemalam ba dia meseti diperesa pengangat isi enggau ngena kereban nyaga diri sebedau kereja,” ku iya seraya madahka semua taba projek deka ngena SOP baru.

Ku Abang Johari, pekara nya udah tentu deka nambahka ungkus ti diguna.

Terang iya, pekara bekaul pengelikun nya pekara ti beguna amat diatu.