SOP PKPB bepun diterit pukul 12.01 tengah malam tu

KUCHING: Lepas pukul 12.01 tengah malam tu legi (9 November) Atur Mindah Betagang Belebas (PKPB) di Pelilih Menua Kuching bepun diterit.

Entara Atur Pengawa Standard (SOP) ti dikeluarka Komiti Penyangga Penusah Ngenyit Negeri (JPBN) madahka semina tiga iku aja isi rumah dikemendarka keluar ari rumah ungkup tuju ngulihka bekal pemakai, barang pemun, ubat enggau guna bukai.

Kelimpah ari nya, raban ti berisiko besai enggau nembiak mit enda diasuh keluar ngagai palan mensia mayuh.

Taja pia, servis bas, teksi enggau e-hailing maksimum dua iku penumpang dikemendarka beroperasyen ari pukul 6 pagi ngagai 10 malam.

Bagi kes berat baka sakit enggau nguruska pemidang di pelilih menua bukai pengawa nya dikemendarka tang mesti minta surat pemendar ari Polis Diraja Melaysia (PDRM).

Pejalai aktiviti ekonomi baka pasar, palan bebeli barang enggau stail bedaja mengkang dikemendarka tang mesti nitihka SOP ti meruan.

Ungkup restoran, kedai makai, food truck, orang bedaja tisi jalai, kedai tisi jalai, kedai runchit enggau kedai mit sida dikemendarka beroperasyen berengkah pukul 6 pagi nyentuk 10 malam aja.

Maya PKPB tu mega, semua aktiviti pengarap enda dikemendarka lalu pengawa ngatur rumah sembiang ungkup pengarap ukai Islam bepanggai ngagai SOP Unit Pekara Pengarap Bukai (Unifor).

Nangkan nya, aktiviti kelab malam, karaoke, meda mayang enggau aum besai enda dikemendarka tang ungkup aum latih bala pengatur dipinta ngaga aum ba online.

Suara Sarawak